ދުނިޔޭގައި އެންމެ ގިނައިން ގައުމުތަކަށް ދަރަނިދޭ ގައުމަކީ ޗައިނާ އެވެ. ޗައިނާއިން ގައުމުތަކަށް ދީފައިވާ ދަރަނި ދުނިޔޭގެ ޖީޑީޕީގެ ފަސް ޕަސެންޓަށް އަރައެވެ. އަދި ޗައިނާއިން ދީފައިވާ ދަރަނީގެ އަދަދު އައިއެމްއެފްއާއި ވަރލްޑް ބޭންކުން ދީފައިވާ ދަރަންޏަށް ވުރެންވެސް އިތުރެވެ.
2019އާ ހަމައަށް ޗައިނާ ޑިވެލޮޕްމެންޓް ބޭންކާއި ޗައިނާ އެގްޒިމް ބޭންކުން ވަނީ ތަރައްގި ވަމުން އަންނަ ގައުމުތަކަށް 120 ބިލިއަން ޑޮލަރުގެ ލޯން ދީފައެވެ.
ޗައިނާއިން ލޯން ދިންނަމަވެސް ޗައިނާގެ ލޯންތަކަކީ ގައުމުތައް އަތްދަށު ލުމަށް ދޭ ލޯންތަކެއް ކަމަށްވެސް ތުހުމަތު ކުރެވެއެވެ. ޗައިނާއިން ލޯން ދިނުމުގެ އެއްބަސްވުންތަކުގައި ހިމެނޭ އެންމެ ނުރައްކާތެރި މާއްދާއަކީ ލޯނު ނަގާކަން ނުވަތަ ލޯނުގެ އަދަދު ހާމަ ކުރުން މަނާ ކުރާ ނުވަތަ ސިއްރު ކުރުމަށް ބާރުއަޅާ މާއްދާއެވެ.
ދުނިޔޭގެ ދަރަނި ދޭ ގައުމުތަކާއި މުއައްސަސާތައް ބައިވެރިވާ ޖަމާއަތައެއް އޮވެއެވެ. ޕެރިސް ކްލަބަކީ، ދަރަނި ނަގާ ގައުމުތަކުން ދަރަނި ދެއްކުން ދަތިވެއްޖެނަމަ، މަޝްވަރާ ކުރުމަށް އޮންނަ މެހްފިލެވެ. ނަމަވެސް ޗައިނާއަކީ ޕެރިސް ކްލަބްގެ މެމްބަރެއް ނޫނެވެ. އެހެންވެ، ޕެރިސް ކްލަބްގައި ހިމެނޭ ގައުމުތަކަށް ޕެރިސް ކްލަބްގެ ގަވާއިދުގެ ދަށުން އޮންނަ ހުރަސްތަކެއް ޗައިނާއަކަށް ނޯވެއެވެ. އެހެންވެ، ޗައިނާއިން ބޭނުން ނަމަ ދަރަނި ނަގާފައިވާ ގައުމަކަށް އިތުރަށް ދަރަނި ދައްކާނެ ތާވަލެއް ނެތިވެސް ބޭނުން އަދަދަކަށް ދަރަނި ދެވިދާނެއެވެ.
ޗައިނާއިން ލޯން ދީފައިވާ ގައުމުތަކުން އެއްކޮށްފައިވާ ސަތޭކައެއްހައި އެއްބަސްވުން ބައިނަލްއަގްވާމީ ޖަމުއިއްޔާތަކުންނާއި ރިސާޗް އިދާރާތަކުން ވަނީ ދިރާސާ ކޮށްފައެވެ. މި ދިރާސާއިން ދައްކަނީ ޗައިނާއިން އެއްބަސްވުންތަކާއި އެއްބަސްވުންތަކުގެ މާއްދާތައް ސިއްރުކުރުމަށް އެއްބަސްވުމުގައި އެކުލަވާފައިވާ މާއްދާތަކެވެ. އަދި މައްސަލައެއް ޖެހިއްޖެނަމަ، ޗައިނާގެ ލޯން ދެއްކުން އިސްކުރުމަށް މަޖުބޫރު ކުރާ މާއްދާތަކާއި ޗައިނާއަށް ބާރުދޭ މާއްދާތަކެވެ.
