އިންޑިއާއާއި އޮމާނުން އިއްޔެ ކަނޑުގެ ސަލާމަތާ ބެހޭ އެއްބަސްވުމެއްގައި ސޮއިކޮށްފިއެވެ. މި އެއްބަސްވުން ސޮއިކޮށްފައި ވަނީ އޮމާންގައި އިންޑިއާގެ ކަނޑިގެ ސިފައިންގެ ވެރިޔާ އެޑްމިރާލް ކަރަމްބީރު ސިންގއާއި އޮމާންގެ ކަނޑިގެ ސިފައިންގެ ވެރިޔާ ސައިފް ބިން ނަސީރު އައްރިބްޙީ އެވެ.
އިންޑިއާގެ ސިފައިންގެ ވެރިޔާގެ ދަތުރުފުޅަކީ ތިން ދުވަހުގެ ދަތުރެކެވެ.
އިންޑިއާ ސިފައިން ބުނިގޮތުގައި މި އެއްބަސްވުމުގެ ދަށުން ކަނޑު ދަތުރުފަތުރާ ބެހޭ މަޢުލޫމާތު ދެ ގައުމުގެ ދެމެދު ޙިއްސާކުރާނެއެވެ. އިންޑިއާއާއި އޮމާނަކީ އަސްކަރީ ގުޅުމުގެ ދާއިރާގައި އެއް ގައުމުން އަނެއް ގައުމަށް އެހީތެރިވެދޭ ދެ ގައުމެވެ.
އިންޑިއާގެ ސިފައިންގެ ވެރިޔާގެ ދަތުރުފުޅުގައި އޮމާންގެ އަސްކަރީ މުއައްސަސާތަކާއި އަސްކަރީ ތަޢުލީމު ދޭތަންތަނަށް ޒިޔާރަތް ކުރެއްވުންވެސް ހިމެނެއެވެ.
އިންޑިއާއަކީ އޮމާންގެ ކަނޑުގެ ސިފައިންނަށް ތަމްރީނު ދިނުމުގެ މަސައްކަތް ކުރާ ގައުމެއްވެސް މެއެވެ. އިންޑިއާއާއި އޮމާނުން ބާއްވާ ކަނޑުގެ އަސްކަރީ ތަމްރީންތައް ނަސީމުލް ބަޙުރުގެ ނަމުން، 1993ން ފެށިގެން ކުރިއަށް ދެއެވެ.
ދެ އަހަރުން އެއްފަހަރު ބާއްވާ ތަމްރީންތައް އެންމެ ފަހުން އޮތީ ގޯވާގައި 2020ގައެވެ.
