ޗައިނާއިން ވަނީ ޗައިނާގެ ގައުމީ ދުވަހާ ދިމާކޮށް ޓައިވާނަށް ބިރު ދެއްކުމުގެ ގޮތުން އެގައުމުގެ މަތިން 38 މަތިންދާބޯޓު އުދުއްސާފައެވެ. ޗައިނާއިން ޓައިވާނަށް ބިރު ދައްކާފައިވާއިރު، އިނގިރޭސިވިލާތުން ޓައިވާން ކަނޑުއޮޅިއަށް މަނަވަރުތައް ފޮނުވުން ޗައިނާ އިން މާނަކޮށްފައިވަނީ އެއީ ނުބައި ނިޔަތުގައި އިނގިރޭސިން ކޮށްފައިވާ ކަމެއްކަމަށެވެ.
ޓައިވާނުގެ ޑިފެންސް މިނިސްޓްރީން ބުނިގޮތުގައި ޓައިޕެއިން ވަނީ ޗައިނާއިން ފޮނުވި ޖޭ16ގެ 18 މަތިންދާ ބޯޓާއި އެސްޔޫ 30ގެ ފައިޓަރޖެޓްތަކާއި އެޗް6 ބޮން އަޅާބޯޓާ ދެކޮޅަށް މަތިންދާބޯޓްތައް އުދުއްސައި މި ބޯޓްތައް ފައްސާލާފައެވެ.
ޓައިވާނުން ބުނިގޮތގައި ހުކުރު ދުވަހާއި ހޮނިހިރު ދުވަހުވެސް ޗައިނާއިން ޓައިވާން މައްޗަށް މަތިންދާބޯޓްތައް ފޮނުވާފައި ވެއެވެ.
ޓައިވާނުން ކޮށްފައިވާ ތުހުމަތުތަކަށް ޗައިނާއިން އަދި ރައްދު ދީފައެއް ނުވެއެވެ.
