ޕާކިސްތާނުން ހަނގުރާމަވެރިންނާ ދެކޮޅަށް ފިޔަވަޅު އެޅުމަށް އެމެރިކާގެ އިސް މަސްއޫލުވެރިއަކު ގޮބވާލައްވައިފިއެވެ. ޑެޕިއުޓީ ސެކްރެޓެރީ އޮފް ސްޓޭޓް ވެންޑީ ޝަރމަން ޕާކިސްތާނަށް މިފަދައިން ގޮވާލެއްވީ އޭނާ ޕާކިސްތާނަށް ކުރެއްވުމަށް ހަމަޖެހިފައިވާ ދަތުރުފުޅުގެ ކުރިންނެވެ. އިސްލާމްއާބާދަށް އޮކްޓޯބަރު 7 އަދި 8 ގައި ކުރައްވާ ދަތުރުފުޅުގައި އޭނާ ޕާކިސްތާންގެ މަސްއޫލުވެރިންނާ ބައްދަލު ކުރައްވާނެއެވެ.
ނޫސްވެރިންނާ ވާހަކަ ދައްކަވަމުން ޝާރމަން ވިދާޅުވީ އެމެރިކާއިން ބޭނުންވަނީ ޕާކިސްތާނާއެކު ހަރުދަނާ ގުޅުމެއް ބާއްވާށެވެ. އެހެންވެ، އެމެރިކާއިން ޕާކިސްތާނުން އުންމީދު ކުރަނީ އެއްވެސް ތަފާތު ކުރުމަކާ ނުލައި ޓެރަރިސްޓް ޖަމާއަތްތަކާއި ހަނގުރާމަވެރި ޖަމާއަތްތަކާ މެދު ފިޔަވަޅު އަޅަމުން ގެންދިއުމަށެވެ.
ޕާކިސްތާނާއި އެމެރިކާއަކީވެސް ޓެރަރިޒަމްގެ ސަބަބުން ބޮޑެތި ގެއްލުމާ ކުރިމަތިލާން ޖެހިފައިވާ ދެގައުމު ކަމުގައި އޭނާ ވިދާޅުވިއެވެ.
ޝާރމަން ކުރައްވާ ދަތުރުފުޅުގައި ސުއިޒަރލެންޑާއި ޕާކިސްތާނާއި އިންޑިއާއާއި އުޒުބެކިސްތާނަށް ވަޑައި ގަންނަވާނެއެވެ.
ޕާކިސްތާންގެ ބޮޑު ވަޒީރު ވިދާޅުވެފައި ވަނީ ޕާކިސްތާނުގައި މަނާ ޖަމާއަތެއްކަމަށް ކަނޑައަޅާފައިވާ ތަޙްރީކޭ ތާލިބާނޭ ޕާކިސްތާނާއެކު ހަތިޔާރު ބެހެއްޓުމަށް ސަރުކާރުން މަޝްވަރާތައް ފަށާފައިވާ ކަމުގައެވެ.
