އިންޑިއާ ސަރުކާރުގެ އަމާޒަކީ ތިން އަހަރު ތެރޭ ކަޝްމީރު ފަތުރުވެރިކަމުގައި ސުއިޒަރލެންޑް ފެންވަރަށް ތަރައްގީ ކުރުމެވެ. ކަޝްމީރުގެ އުމްރާނީ ތަރައްގީއށް ޚާއްސަ ސަމާލުކަމެއް ދެވެމުންދާ ކަމަށް ވިދާޅުވަމުން އިންޑިއާގެ ހައިވޭއާ ބެހޭ ވަޒީރު ވިދާޅުވަނީ މިހާރު ކުރެވެމުންދާ މަސައްކަތާއެކު ކަޝްމިރުގައި ހައިވޭތައް ތިން އަހަރު ތެރޭ ފަސް ގުނައަށް އިތުރުވެގެންދާނެ ކަމުގައެވެ. ހަމައެ އާއެކު، ހޮޓަލާއި ރެސްޓޯރެންޓްތައްވެސް ދިހަ ގުނައަށް އިތުރުވާނެ ކަމުގެ ޔަގީންކަން އޮތް ކަމުގައި އޭނާ ވިދާޅުވެއެވެ. އަދި ބިދޭސީންނާއި ދޭސީ ފަތުރުވެރިން އައުމުގެ ސަބަބުން ކަޝްމީރުގެ ދަތުރުފަތުރުތައްވެސް ފަސް ގުނައަށް އިތުވާނެ ކަމަށް ދައްކާ ކަމަށް އޭނާ ލަފާ ކުރައްވައެވެ.
ފަތުރުވެރިކަމުގެ ދާއިރާއަށް މީހުން ތަމްރީން ކުރުމަށް ސްޓޭޓް ސަރުކާރުން ޚާއްސަ މަސައްކަތެއް ފަށާފައި ވެއެވެ. އަދި ފަތުރުވެރިކަމާ ގުޅުން ހުރި ކެޕިޓަލް އިންވެސްޓްމެންޓްތައްވެސް 49 އިންސައްތައަށް އިތުރުވެފައިވާ ކަމަށްވެސް ދައްކައެވެ.
އޭޝިއާގެ ބިމުއަޑީގެ އެންމެ ދިގު މަގުވެސް ހަދަމުން ދަނީ ކަޝްމީރުގައެވެ. މިއީ 13.5 ކިލޯ މީޓަރުގެ ދިގު ބިމު އަޑީ މަގެކެވެ. މި ބިމު އަޑީ މަގުގެ ސަބަބުން ހުރިހައި މޫސުމެއްގައިވެސް ލަދާކްއާ އިންޑިއާގެ އެހެން ހިސާބުތަކާ ދެމެދު ދަތުރު ކުރެވޭނެއެވެ. ލަދާކަކީ، ކުރިން ސުނޯ ފޭބުމުގެ ސަބަބުން ބަންދު ސަރަހައްދެކެވެ.
