އަފްޣާނިސްތާނަކީ ދުނިޔޭގައި އެންމެ ގިނައިން އަފިހޫން އުފައްދާ ގައުމެވެ. މުޅި ދުނިޔޭގެ އަފިހޫން ސަޕްލައިގެ ފަސްބައިކުޅަ ހަތަރު ބައި އުފައްދަނީ އަފްޣާނިސްތާންގައެވެ. ޔޫކޭގެ ދަ ޓެލެގްރާފް ބުނާ ގޮތުން އަފްޣާނިސްތާންގެ ދެކުނުގެ ސަރަހައްދުގައި ބާޒާރުތަކުގައި މިނިވަންކަމާއެކު އަފިހޫން ވިއްކަމުން ގެންދެއެވެ. އަދި މި އަފިހޫން އަވަށްޓެރި ގައުމުތަކަށް އެތެރެކޮށް އެއިން ހެރޮއިން އުފައްދައި ދުނިޔެއަށް ބޭރުކުރެއެވެ.
ތާލިބާނުން ބުނެފައި ވަނީ އެމީހުންގެ ވެރިކަމެއްގައި އަފިހޫންގެ ދަނޑުވެރިކަމަށް ފުރުސަތު ނުދޭނެ ކަމަށެވެ. ދަ ޓެލެގްރާފުން ބުނާ ގޮތުން އެނޫހުގެ ރިޕޯޓަރާ ވާހަކަ ދެއްކި ހެލްމަންދުގެ މީހުން ބުނެފައި ވަނީ އައު މޫސުމަށް އެމީހުންގެ ދަނޑުތައް އަފިހޫން އިންދުމަށް ދަނީ ތައްޔާރުކުރަމުންނެވެ.
2018ވަނަ އަހަރު އދން އަންދާޒާ ކުރިގޮތުގައި އަފްޣާނިސްތާންގެ އިގްތިސާދުގެ 11 އިންސައްތައަކީ އަފިހޫނުން ލިބޭ އާމްދަނީ އެވެ. ދަ ޓެކެގްރާފުން ބުޏާ ގޮތުގައި ޔޫކޭގައި ބޭނުން ކުރާ ހެރޮއިންގެ 90 އިންސައްތައަކީ އަފްޣާނިސްތާންގެ އަފިހޫން ބޭނުންކޮށްގެން އުފައްދާފައިވާ ހެރޮއިން އެވެ.
