އިސްލާމްއާބާދު އިންޓަރނޭޝަނަލް އެއަރޕޯޓްގެ ކޮންސްޓްރަކްޝަންގައި ހިމެނޭ ކޮރަޕްޝަންގެ މައްސަލަތައް ބެލުމަށް ޕާކިސްތާންގެ ދެ އިދާރާއަކުން މަސައްކަތް ފަށައިފިއެވެ. އެންޓިކޮރަޕްޝަން އިދާރާއާއި ފެޑެރަލް އިންވެސްޓިގޭޓިވް އެޖެންސީން މި މައްސަލަ ތަހުގީގު ކުރަމުންދާކަން ކަށަވަރު ކޮށްދެއްވީ ޕާކިސްތާންގެ ސެނެޓްގައި ވާހަކަ ދައްކަވަމުން ވަޒީރު ގުލާމް ސަރަވާރް ޚާންއެވެ. އޭނާ ވާހަކަ ދެއްކެވީ އިސްލާމްއާބާދު އިންޓަރނޭޝަނަލް އެއަރޕޯޓްގެ ކޮންސްޓްރަކްޝަންގެ މައްސަލަތަކާ ބެހޭ ގޮތުން ސެނެޓަށް ވެރިކަން ކުރާ ތަހްރީކޭ އިންސާފް ޕާޓީގެ މެމްބަރަކު ހުށަހެޅި ގަރާރަކާ ގުޅިގެންނެވެ.
އިސްލާމްއާބާދު އިންޓަރނޭޝަނަލް އެއަރޕޯޓް ހަދައި ހުޅުވީ މިހާރުގެ މައި އިދިކޮޅު ދެ ޕާޓީ ކަމުގައިވާ ޕާކިސްތާން ޕީޕަލްސް ޕާޓީއާއި ޕާކިސްތާން މުސްލިމް ލީގް (ނ)ގެ ވެރިކަމުގައެވެ. އެއަރޕޯޓްގެ ތެރެއަށް ފެން ލީކްވުމާއި ފުރާޅު ވެއްޓުންފަދަ މައްސަލަތައް އެކި ފަހަރުމަތިން ރިޕޯޓް ކޮށްފައި ވެއެވެ. މި މަސައްކަތުގެ ކޮންޓްރެކްޓަރަކީ ޗައިނާ ކުންފުންޏެކެވެ.
