އިންޑިއާއާ ދެކޮޅުވެރި އެއްވެސް ހަރަކާތަކަށް ސްރީލަންކާ ބޭނުން ކުރުމަށް އެއްވެސް ފުރުސަތެއް ނޯންނާނެ ކަމަށް ސްރީލަންކާގެ ރައީސް ގޯތާބަޔާ ރާޖާޕަކްސަ ވިދާޅުވެއެވެ. އިންޑިއާގެ ފޮރިން ސެކްރެޓެރީ ހަރްޝްވަރްދަން ޝްރިންގްލާއާއެކު ބޭއްވެވި ބައްދަލު ކުރެއްވުމުގައި ސްރީލަންކާގެ ރައީސް ވިދާޅުވީ، އިންޑިއާގެ ސަލާމަތަށް ނުރައްކާވާފަދަ އެއްވެސް ކަމެއް ސްރީލަންކާއިން ކުރުމަށް ހުއްދައެއް ނުދެވޭނެ ކަމަށެވެ.
ދެބޭފުޅުން ކުރެއްވި މަޝްވަރާތަކުގައި ސަލާމަތީ ކަންތައްތަކާއި ކޯވިޑް19އަށް ފަހު އިގްތިސާދީ ގޮތުން ސްރީލަންކާ އަށް އެހީތެރިވުން ހިމެނެއެވެ.
ސްރީލަންކާއަށް ކުރެއްވި ހަތަރު ދުވަހުގެ ޒިޔާރަތް ނިންމަވާލައްވަމުން ޝްރިންގްލާ ވަނީ ސްރީލަންކާގެ ރައީސްގެ އަރިހަށް އިޙުތިރާމްގެ ޒިޔާރަތެއް ކުރައްވާފައެވެ. ޝްރިންގްލާގެ މިދަތުފުޅަކީ، ސްރީލަންކާގެ ފޮރިން ސެކްރެޓަރީ ކޮލަމްބަގޭގެ ދައުވަތަކަށް ކުރެއްވި ދަތުރުފުޅެކެވެ.
