އަފްޣާނިސްތާންގެ ކަންދަހާރްގެ ފިހާރަތަކގައި އެމެރިކާ ހަތިޔާރުތައް ވިއްކުން އާންމު ވެފައިވާ ކަމަށް ނިއުޔޯކް ޓައިމްސްއިން ރިޕޯޓް ކުރެއެވެ. ވިޔަފާރި ވެރިން މި ހަތިޔާރު ހޯދާފައިވަނީ އެމެރިކާ ސިފައިން ފައިބައިގެން ދިޔަފަހުން، އަފްގާން ސިފައިންނާއި ފަހުން ވެރިކަން ހޯދި ތާލިބާނުންގެ ހަނގުރާމަވެރިންނަށް ފައިސާދީގެން އެމީހުން އަތުންނެވެ.
މި ތަންތާނގައި ވިއްކާ ސާމާނުތަކުގެ ތެރޭގައި އެމެރިކާގައި އުފައްދާފައިވާ ފިސްތޯލަތަކާއި ރައިފަލްއާއި އަތު ބޮމާއި ރޭގަނޑު ބަލަން ބޭނުން ކުރާ ދުރުމީ ހިމެނެއެވެ.
އެމެރިކާއިން 83 ބިލިއަން ޑޮލަރަށް ވުރެން ގިނައިން އަފްޣާނިސްތާނަށް ވިހި އަހަރުގެ ތެރޭގައި ހޭދަ ކޮށްފައި ވެއެވެ. އެމެރިކާ ސިފައިން ފައިބައިގެން ދިޔަފަހުން ތާލިބާނުން ވަނީ އެމެރިކާ ސިފައިން ދޫކޮށްފައި ދިޔަ ގިނަ އަދަދެއްގެ ހަތިޔާރު ހޯދައި އޭގެ ވިޔަފާރި ފަށާފައެވެ.
އެމެރިކާއިން ކުރިން ބުނެފައި ވަނީ މޮޅު ހަތިޔާރުތައް ހުންނާނީ އެހެން ބަޔަކަށް ބޭނުން ނުކުރެވޭ ގޮތް ހަދާފައެވެ.
އަފްޣާނިސްތާނުން ބައެއް ހަތިޔާރުތައް ޕާކިސްތާނަށް ބޭރުކޮށްފައިވާ ކަމަށްވެސް ތުހުމަތު ކުރެވެއެވެ. ނަމަވެސް ތާލިބާނުން މިވާހަކަ ދޮގު ކުރެއެވެ.
