ސިޔާސީ އަދި ވިޔަފާރީގެ ދާއިރާގައި ހިންގާ ޖަރީމާތައް ތަހްގީގު ކޮށް ރިޕޯޓް ކުރާ ބައިނަލްއަގްވާމީ ނޫސްވެރިންގެ ޖަމާއަތުން އަނެއްކާވެސް ޖަރީމާތައް ތިލަކޮށް، އައު ޑޮކިއުމެންޓްތަކެއް އާންމުންނާ ހަމައަށް ގެނަސްދީފިއެވެ. އިންޓަރނޭޝަނަލް ކޮންސޯޓިއަމް އޮފް އިންވެސްޓިގޭޓިވް ޖާރނަލިސސްޓްސް (އައިސީއައިޖޭ) އިން މިފަހަރު ފާއްދާލާފައިވާ ޑޮކިއުމެންޓްތަކަށް ދީފައިވާ ނަމަކީ ޕަންޑޯރާ ޕޭޕާސްއެވެ. މީގެ ކުރިން މި ޖަމާއަތުން ތިލަ ކޮށްދީފައި ވަނީ ޕެނަމާ ޕޭޕާސްއެވެ.
ދުނިޔޭގެ އެތައް ގައުމެއްގައި ނޫސްވެރިން ގުޅިގެން ކޮށްފައިވާ ތަހުގީގަށް ފަހު 11.9 މިލިއަން ފައިލް ފަނީ އާންމުންނާ ހަމައަށް ގެނަސްދީފައެވެ. ޕެންޑޯރާ ޕޭޕާސްގައި ހިމެނޭ 11 މިލިއަނަށް ވުރެން ގިނަ ޑޮކިއުމެންޓްތަކަކީ، ވާރު މައާފްކޮށްދީފައިވާ ގައުމުތަކުގައި ހިންގާ 14 ކުންފުންޏަކުން ފާއްދާލައިފައިވާ ފައިލްތަކެކެވެ. މީގައި ކޭމަން އައިލެންޑްސްއިން ފެށިގެން ސުއިޒަރލެންޑްގައި ފައިސާ ފޮރުވުމަށް ސިޔާސީ ލީޑަރުންނާއި ވުނަދަންކާރުން ބޭނުންކޮށްފައިވާ ކުންފުނިތަކާއި މުއާމަލާތުތައް ހިމަނާފައި ވެއެވެ.
ޕެންޑޯރާ ޕޭޕާސްގައި ދެކުނު އޭޝިއާގައި އެންމެ ފާހަގަ ކުރެވެނީ ސަރަހައްދުގެ އެންމެ ފަގީރު އެއްގައުމުގެ ސިޔާސީ ލީޑަރުން ވެރިކަމުގައި ހޭދަކޮށްފައިވާ ކުރު މުއްދަތުގެ ތެރޭގައި ގައުމުން ބޭރަށް ފާއްދާލާފައިވާ ބޮޑެތި އަދަދުތަކެވެ.
ޕާކިސްތާންގެ އިމްރާން ޚާން ބޮޑު ވަޒީރުގެ ކެބިނެޓްގައި ހިމެނިވަޑައިގަންނަވާ އެތަކެއް ވަޒީރުންނާއި އަސްކަރީ އެތަކެއް ލީޑަރުންގެ ނަންތައް މި ޑޮކިއުމެންޓްތަކުގައި ހިމަނާފައި ވެއެވެ. ޖުމުލަ ޕާކިސްތާންގެ 700އެއްހައި މީހެއްގެ ނަން، ވާރު ނުނަގާ ސަރަހައްދުތަކުގައި ފައިސާ ފޮރުވުމަށްޓަކައި ބޭންކުކޮށްފައިވާ ކަމަށް މި ޑޮކިއުމެންޓްތަކުން ދައްކައެވެ.
ޕެންޑޯރާ ޕޭޕާސްގައި އިންޑިއާ މީހުންގެ ނަންތައްވެސް ހިމެނެއެވެ. ނަމަވެސް ޕާކިސްތާނާ ޚިލާފަށް އާބާދީ ބައިބޯ އިންޑިއާއިން ހިމަނާފައިވާ ނަންތަކަކީ ނިސްބަތުން މަދު ނަން ތަކެކެވެ. އިންޑިއާއިން ފައިސާ ފޮރުވާފައިވާ މީހުންނަކީ ކުޅިވަރާއި ފަންނުގެ ދާއިރާގެ ފަރާތްތަކާއި ވުނަދަންކާރުންނާއި ސާދާގަރުންނެވެ.
ހިތާމައަކީ، ދަރަނިތައް އިތުރުވެ، ކޮވިޑާއި ގުޅިގެން އިގްތިސާދީ ހަރަކާތަށް ބަނަކަމެއް އައިސްފައިވާ ޕާކިސްތާންގެ ގިނަ އަދަދެއްގެ ޝަޚްސިއްޔާތުތަކެއްގެ ނަން މި ލިސްޓުތަކުން ފެނުމެވެ. ޕާކިސްތާނަކީ ޒުވާޏުންގެ މެދުގައި ވަޒީފާނެތް ނިސްބަތް 24 އިންސައްތައިގައި އޮތް ގައުމެކެވެ. ޕާކިސްތާން އިންސްޓިއުޓް އޮފް ޑިވެލޮޕްމެންޓް އިކޮނޮމިކްސް އިން މިއަދަދު ކަށަވަރު ކޮށްދެއެވެ.
ޕާކިސްތާންގެ ބޮޑު ވަޒީރު ޚާނަށް ވެރިކަމަށް ވަޑައި ގެންނެވުނީ 2016 ވަނަ އަހަރު ޕެނަމާ ޕޭޕާސްގެ ޑޮކިއުމެންޓްތަކުގައި ކުރީގެ ބޮޑު ވަޒީރު ނަވާޒް ޝަރީފާއި އާއިލާއިން ގިނަ އަދަދަކަށް ފައިސާ ފޮރުވަން ވާރު މައާފް ސަރަހައްދުތަކުގެ ބެންކްތަކަށް ލައިގެން އުޅުނުކަން ބޭޒާރު ކޮށްލުމުންނެވެ. އަދި ސިފައިން ސީދާ އިންތިޚާބަށް އަތް ބޭނުމުންވެސް މެއެވެ. ޚާން ވެރިކަމަށް ވަޑައިގަތުމަށް ކޮރަޕްޝަންއާ ދެކޮޅަށް ގަދައަށް ވަކާލާތު ކުރެއްވިއެވެ.
މިހާރު ޕެންޑޯރާ ޕޭޕާސްގައި ހިމެނޭ ނަންތަކަކީ ޚާންގެ ކެބނެޓްގެ މެންބަރުންނާއި އާއިލާ މީހުންގެ ނަންތަކެވެ. ޚާންގެ އަސްކަރީ ލީޑަރުންގެ ނަންތައް ވެސް އައިސްފައިވާ އަދަދު މަދެއް ނޫނެވެ.
ބޮޑު ވަޒީރު ޚާންގެ އެންޓި ކޮރަޕްޝަން މަސައްކަތަށް މިއިން ހިޔަނި އެޅެއެވެ.
ޕެންޑޯރާ ޕޭޕާސް ބޭޒާރުކުރުމާއެކު ޚާން ވަނީ މި މަޢުލޫމާތު ހާމަ ކުރުމުގެ މަސައްކަތަށް ތައުރީފް ކުރައްވާފައެވެ. އަދި ތުހުމަތު ކުރެވޭ ފަރާތްތަކުގެ މަޢުލޫމާތު ބެލުމަށްފަހު ފިޔަވަޅު އަޅުއްވާނެ ކަމުގައިވެސް ވިދާޅުވެފައެވެ. ނަމަވެސް ފަހުން ޚާން ވަނީ ރާގު ބަދަލު ކުރައްވާފައެވެ.
އޭނާ ވިދާޅުވީ ހުޅަނުގުން ޕެންޑޯރާ ޕޭޕާސްއާ މެދު ބަލަންވާނީ މޫސުމަށް އަންނަ ބަދަލުފަދަ ކާރިސާއެއްގެ ގޮތުގައެވެ. ދެން ޚާން ވިދާޅުވީ މުއްސަނދިންނާއި ފަގީރުންގެ ފަރަގު ކުޑަ ކުރަން ޖެހޭނެކަމަށާއި ނޫންނަމަ ފަގީރުން އިތުރުވެ، ހުޅަނގަށް މީހުން ހޖުރަ ކުރަން ފަށާނެ ކަމަށެވެ.
ތަޖުރިބާކާރުން ވިދާޅުވާ ގޮތުގައި ޕާކިސްތާންގައި ސިފައިންނާ ދެކޮޅަށް ފިޔަވަޅު އެޅުމަކީ މުސްތަހީލު ކަމެކެވެ. އެހެންވެ، ސުއާލުކޮށްލުމަށް ވުރެން އިތުރު ކަމެއް ޕާކިސްތާނަކުން ނުކުރާނެއެވެ.
