ޗައިނާއިން ޓައިވާނާ ދެކޮޅަށް ހިންގާ އުދުވާން އިތުރު ވެފައި ވަނިކޮށް ޗައިނާގެ ރައީސް ޝީ ވިދާޅުވަނީ ޗައިނާއާއެކު ޓައިވާން އިއްތިހާދު ކުރަންވާނެ ކަމަށެވެ. ޝީގެ މިވާހަކައަށް ރައްދު ދެއްވަމުން ޓައިވާންގެ ރިއާސީ ތަރުޖަމާން ޒާވިޔާ ޗާންގ ވިދާޅު ވަނީ ޓައިވާނަކީ ދުނިޔެއިން ބަލައިގެންފައިވާ މިނިވަން ގައުމެކެވެ. އަދި ޓައިވާނަކީ ޗައިނާގެ ބައެއް ނޫން ކަމަށެވެ.
ޗައިނާގެ ރައީސް ވިދާޅުވެފައި ވަނީ ޓައިވާންގެ މައްސަލާގެ ތެރެއަށް ބޭރުގެ ފަރާތަކުން ވަދެ ގަތުމަކީ ޗައިނާއިން ބަލައި ގަންނާނެ ކަމެއް ނޫން ކަމަށެވެ. އަދި ޓައިވާން މައްސަލައަކީ ޗައިނާގެ ދާޚިލީ މައްސަލައެއްކަމަށްވެސް ޝީ ސިފަ ކުރެއްވިއެވެ. ޝީ ވާހަކަ ދެއްކެވީ ޝިންހާއީ ރެވަލޫޝަންއަށް 110 އަހަރު ފުރުނު މުނާސަބާގައެވެ.
ޗާންގ ވިދާޅުވީ 1911ގެ އިންގިލާބުން އުފެދިގެން ދިޔައީ ޑިމޮކްރެޓުކް ރިޕަބްލިކެއް ކަމުގައެވެ. އަދި ޗައިނާއިން ހޮންކޮންގ ގައި ކަން ކޮށްފައިވާ ގޮތުން ޗައިނާގެ އިޚުލާސްތެރިކަމެއް ނެތް ކަމަށްވެސް އޭނާ ވިދާޅުވިއެވެ. އަދި ޓައިވާނުން 50 އަހަރު ވަންދެން ޑިމޮކްރެޓިކް ނިޒާމެއް ދަމަހައްޓާފައިވާ ކަމީ ޗައިނާއާއި ޓައިވާންގެ ތަފާތުކަން ދައްކައިދޭ ކަމެއް ކަމުގައިވެސް އޭނާ ވިދާޅުވިއެވެ.
