ބެއާ ގްރިލްސްއާއެކު އިންޓު ދަ ވައިލްޑްގައި އަޖޭދޭވްގަން ރާއްޖޭގައި ވީޑިއޯކުރި އެޕިސޯޑުގެ މަންޒަރެއް އިޝްތިހާރުގައި ދައްކާލައިފިއެވެ.
ޔޫޓިއުބުން ފެނުނު މި ވީޑިއޯގައި ދައްކާލި އެއް މަންޒަރަކީ ދިވެހިރާއްޖޭގެ ފަޅު ރަށެއްގައި އަޖޭ އާއި ބެއާ ގްރިލްސް ކަނދެއް މޫދަށް ބާލަން އުޅެނިކޮށެވެ. އެއަށްފަހު މޫދުގައި މި ދެފަންނާނުން ހަރަކާތްތެރިވާ މަންޒަރު ވެސް ޓްރެއިލާގައި ދައްކާލައެވެ. ދިވެހިރާއްޖޭގެ ރީތި މަންޒަރުތައް ދައްކާ މި އެޕިސޯޑުގައި ކަނޑުއަޑީގެ ޚާއްސަ ދިރުމެއް ކަމަށްވާ މިޔަރުވެސް ފެނެއެވެ. މި ދައްކާލުމުގައި ބެއާ ގްރިލްސް އަޖޭ ގާތު އަޑު އިވެއެވެ. "އިފް ވީ ސީ އަ ޝާކް ސްޓޭ ކާމް،"
އިންޓް ދަ ވައިލްޑްގެ ތަޖުރިބާ ހާމަކުރަމުން އަޖޭ ދޭވުގަން އޭނާ ސަލާމަތްކޮށްދިނީތީ ބެއާ ގްރިލްސް އަށް ޝުކުރުއަދާކުރިއެވެ. އަދި މިއީ އިންޓް ދަ ވައިލްޑްގަ އޭނާ ކުރި ފުރަތަމަ ތަޖުރިބާ ކަމާއި، މިއީ ކުޑަކުދިން ކުޅޭ ކުޅޭ ކުޅިވަރެއް ނޫންކަމަށް ބުނެއެވެ. " އަހަރެންގެ ބައްޕަ އަކީ އެކްޝަން ޑަރެކްޓަރެއް. އަހަރެން ފިލްމު އިންޑިސްޓްރީގައި މަސައްކަތް ކުރި މި 30 އަހަރުގައި ވަރަށް ނުރައްކާތެރި މަންޒަރުތައް ކުޅެފައިވާނެ، މި އީ އެ މަންޒަރުތަކުން ދަސްވި ކަންތައްތަކުގެ ބޭނުން ހިފަންޖެހުނު އެއް ފަހަރު." ސިންގަމްގެ ތަރި ބުންޏެވެ.
ގުދުރަތީ ނުރައްކާތެރި ހާދިސާތަކުގައި ކަނޑާއި އެއްގަމާއި ޖަންގަލީގައި މީހުން ސަލާމަތް ކުރުމުގެ ހުނަރުތައް ބެއާ ގްރިލްސްގެ އެބަހުރިކަމަށް އަޖޭ ބުނެއެވެ.
އަޖޭދޭވުގަން އާއި ބެއާ ގްރިލްސް "އިންޓް ދަ ވައިލްޑް" ގެ ރާއްޖޭގައި ކުޅުނު މަންޒަރުތައް ހިމެނޭ އެޕިސޯޑް ދައްކަން ހަމަޖެހިފައިވަނީ ޑިސްކަވަރީ ޕްލަސް އިން 22 އޮކްޓޫބަރުގައެވެ. އަދި 25 އޮކްޓޫބަރުގައި ޑިސްކަވަރީ ޗެނަލްއިންވެސް މި އެޕިސޯޑް ދައްކާނެ ކަމަށް ޓްރެއިލާއިން އިޝްތިހާރުގައި ބުނެއެވެ.
