ޗައިނާއިން ބަންގްލަދޭޝްގައި ކުރާ އިންވެސްޓްމެންޓްތަކުގައި އެގައުމުގެ ރައްޔިތުންނާ މެދު ތަފާތު ކުރާ މައްސަލަ ފާހަގަ ކޮށްފިއެވެ. ޗައިނާގެ އިންވެސްޓްމެންޓްތަކުން ތަނުގެ ރައްޔިތުންނާ މެދު ތަފާތު ކުރުން ގެންގުޅެނީނަމަ، ޗައިނާއިން ބަނގްލަދޭޝްގައި ކުރާ އިންވެސްޓްމެންޓްތަކަށް މީގެ ސަބަބުން ނޭދެވޭ އަސަރުތައްކޮށް، ދެ ފަރާތް ދެމެދުގެ ދެބަސްވުން އިތުރުވެގެންދާނެ ކަމަށްވެސް ބުނެއެވެ.
ޕަދްމާ ރެއިލް ލިންކް ޕްރޮޖެކްޓަކީ ނަސްލީ ތަފާތު ކުރުންތަކެއް ގެންގުޅޭ ޕްރޮޖެކްޓެއްކަމަށް ބަންގްލަދޭޝްގެ ސަލާމަތީ ފަރާތްތަކުން ފާހަގަ ކޮށްފައިވާ އެއް ޕްރޮޖެކްޓެވެ. މި ޕްރޮޖެކޓް ހިންގާ ޗައިނާ ކުންފުނިން ބަންގްލަދޭޝްގެ މަސައްކަތު މީހންނަށް ނަފްސާނީ ގޮތުންނާއި ޖިސްމާނީ ގޮތުން އަނިޔާކުރާ ކަމަށްވެސް ބުނެއެވެ. މި ޕްރޮޖެކްޓަކީ، އޭގައި ކޮރަޕްޝަންގެ އަމަލުތަކެއް ހިމެނޭ ކަމަށް ފާހަގަ ކުރެވިފައިވާ ޕްރޮޖެކްޓެކެވެ. މި ޕްރޮޖެކްޓްގެ އެއް ޙިއްސާދާރު ކުންފުންޏެއްކަމަށްވާ ޗައިނާ ރެއިލްވޭ އިންޖިނިއަރިންގ ކޯޕަރޭޝަނުން އެފަރާތުގެ މަންދޫބެއްގެ ގޮތުގައި އައްޔަން ކުރި ޗައިނާ މީހާއަކީ މަސައްކަތަށް ނާގާބިލު މީހެއްކަމަށް ބުނެ، ބަންގްލަދޭޝްއިން ވަނީ އެމީހާގެ ހުއްދަ ކެންސަލް ކޮށްފައެވެ. 2020ގެ މޭ މަހުވެސް މި ޕްރޮޖެކްޓްގައި އުޅުނު މުވައްޒަފުން މުސާރަ ހޯދަން މުޒާހަރާ ކުރުމުން އެމީހުންގެ ގަޔަށް ބަޑި ޖަހައިފައި ވެއެވެ.
މިނޫނަސް އެހެން ޕރޮޖެކްޓްތަކުގައިވެސް ޗައިނާ މީހުން ބަންގްލަދޭޝް މީހުންނާ މެދު ތަފާތު ކުރުން ގެންގުޅޭ ކަމަށް ވެއެވެ. ޗިޓަގޮންގގައި ކޯލާ ދެލިން ކަރަންޓް އުފެއްދުމަށް ޝާންޑޯންގ އިލެކްޓްރިކް ޕަވަރ ކޯޕަރޭޝަނުން ހިންގާ ޕްރޮޖެކްޓްގައި މަސައްކަތު ގަޑި ދިގުވާތިއާއި މުސާރަ ނުދޭތީ އެޕްރީލް މަހު މުޒާހަރާ ކުރުމުން ހިނގި ހަމަނުޖެހުން ތަކުގައި ފަސް މީހުން މަރުވެ 11 މީހުންނަށް ހާނީއްކަ ވިއެވެ.
ޗައިނާއިން ބަންގްލަދޭޝްގައި ހިންގާ ޕްރޮޖެކްޓްތައް ކުރިއަށް ގެންދިއުން ބަންގްލަދޭޝްގެ ސަރުކާރަށް ދަތިކަމަކަށް ވެފައި ވެއެވެ. އެފަރާތުން ބައެއް ޕްރޮޖެކްޓްތައް ކެންސަލްކޮށް އަނެއް ޕްރޮޖެކްޓްތައް ފަސްކޮށް ހަދާފައިވެސް ވެއެވެ.
އެފްރިކާގައި ޗައިނާއިން ހިންގާ ޕްރޮޖެކްޓްތަކުގައިވެސް މިފަދަ މައްސަލަތައް ރިޕޯޓް ކޮށްފައި ވެއެވެ.
