ފަސް ކޮށްފައިވާ ލޯކަލް ކައުންސިލް އިންތިހާބު އަންނަ އަހަރުގެ މާޗުމަހު ބޭއްވުމަށް ޓާގެޓްކޮށް މަސައްކަތް ކުރަމުން އަންނަ ކަމަށް އިލެކްޝަންސް ކޮމިޝަން (އީސީ)އިން ބުނެފިއެވެ.
ރާއްޖެ ޓީވީ ފަލަ ސުރުހީ ޕްރޮގްރާމްގައި މިރޭ ވާހަކަ ދައްކަވަމުން، އިސީގެ މެންބަރު ފުއާދު ތައުފީގު ވިދާޅުވީ، އަމާޒަކީ ކޮވިޑްގެ ހާލަތާއިއެކުވެސް މާޗް މަހު އިންތިހާބު ބޭއްވުން ކަމަށެވެ.
އެމަހު އިންތިހާބު ބޭއްވޭނެ ކަމުގެ 99 އިންސައްތަ ޔަގީންކަން ފުއާދު ދެއްވި ނަމަވެސް އިންތިހާބު އޮންނާނެ ވަކި ދުވަހެއް ވިދާޅެއް ނުވެއެވެ.
މިއަހަރުގެ އޭޕްރީލްމަހުގެ 4 ގައި ބާއްވަން އޮތް ކައުންސިލް އިންތިހާބު ކޮވިޑް 19 ގެ ސަބަބުން ފުރަތަަމަ ލަސްކުރީ އެ މަހު 18 އަށެވެ.
ނަމަވެސް އެތާރީހުގައިވެސް އިންތިހާބު ބޭއްވޭނެ މާހައުލެއް ނެތްކަމަށް ބުނެ އީސީން އިންތިހާބު ނުބާއްވަން ނިންމިއެވެ.
މީގެ އިތުރުން އިންތިހާބު އިތުރަށް ލަސްކޮށްފިނަމަ، ކައުންސިލަތުން އިންތިހާބު ނުކޮށްތިއްގައި، މަގާމުގައި ތިއްބެވި ކައުންސިލަރުންގެ މުއްދަތު ހަމަވެގެން ގާނޫނީ ހުސްކަމަކަށް ދާނެތީ ލޯކަލްކައުންސިލް އިންތިހާބު ފަސް ކުރުމަށް ސަރުކާރުގެ ފަރާތުން ރައްޔިތުންގެ މަޖިލީހަށް، "ލޯކަލް ކައުންސިލްތަކުގެ އިންތިހާބުގެ ހާއްސަ ބިލު 2020" ހުށަހަޅައި ފާސްކުރިއެވެ.
މިބިލްގައި ވާގޮތުން ކައުންސިލް އިންތިހާބު ބޭއްވުމުގެ މަސައްކަތް އިލެކްޝަންސް ކޮމިޝަނުން ދެން ފަށަން ޖެހޭނީ އިންތިހާބާ ގުޅޭ ކަންކަން ކުރިއަށް ގެންދިއުމަކީ އާއްމު ސިއްހަތަށް ނުރައްކަލެއް ކުރިމަތިވާނެ ކަމެއް ނޫން ކަމަށް ދައުލަތުގެ ކަމާބެހޭ ފަރާތްތަކުން ކަނޑައެޅުމުންނެވެ.
އެއާ ގުޅިގެން މިހާރު ތިބި ކައުންސިލަރުންގެ ދައުރު ހަމަވާ އިރު، އާ ކައުންސިލަރުން އިންތިހާބު ކުރެވިފައިނުވާތީ، އާ އިންތިހާބެއް ބާއްވައި ކައުންސިލަރުން މަގާމާ ހަވާލުވަންދެން މިހާރު ތިބި ކައުންސިރުން މަގާމުތަކުގައި ތިބޭގޮތަށް، ގާނޫނުއަސާސީއަށް އިސްލާހު ގެންނަސް ރައްޔިތުންގެ މަޖިލީހުން ވަނީ ފާސްކޮށްފައެވެ.
