އދގައި އަފްޣާނިސްތާން ތަމްސީލުކުރާ ގޮނޑި، ތާލިބާން ޖަމާއަތަށް ނުދިނުމަށް އަފްޣާނިސްތާންގެ އަންހެން ލީޑަރުންތަކެއް ދުނިޔެއަށް ގޮވާލައްވައިފިއެވެ. އދގެ މައި މަރުކަޒަށް ކުރެއްވި ޒިޔާރަތަށްފަހު، ޔޫއެންގެ މައި އިދާރާގެ ބޭރުގައި ނޫސްވެރިންނާ ވާހަކަ ދައްކަވަމުން އަފްޣާނިސްތާންގެ ސިޔާސީ ބޭފުޅެއް ކަމަށްވާ އަދި ސުލްހައިގެ ވާހަކަތަކުގައި އުޅުއްވި ފައުޒިއްޔާ ކޫފީ ވިދާޅުވީ އަފްޣާން މީހުން ތަމްސީލުކުރުމަށް އދގެ ގޮނޑި ދޭންޖެހޭނީ އަފްޣާން މީހުންގެ ޝުއޫރުތައް ޙިއްސާކުރާ ފަރާތަކަށެވެ. އޭނާ ވިދާޅުވީ އަފްޣާން އަންހެނުންނަކީ އެމީހުންނާ ބެހޭ ގޮތުން މީހުން ވާހަކަ ދައްކާ، އަދި އެމީހުންގެ ވާހަކަ މީހުން އަޑު ނައަހާ ބައެއް ކަމަށެވެ.
އޭނާ ވިދާޅުވީ ފައިސާއާއި އެހީއާއި އަދި ބަލައިގަތުންވެސް ލިބެންވާނީ އަފްޣާނިސްތާން މީހުން ތަމްސީލުކުރާ ބަޔަކަށެވެ.
ކޫފީއާއެކު ބައިވެރިވި އެހެން ބައެއް ބޭފުޅުންނަކީ، ކުރީގެ ސިޔާސީ ލީޑަރެއްކަމަށްވާ ނަހީދު ފަރީދުއާއި ކުރީގެ ޑިޕްލޮމެޓް އަސީލާ ވަރްދަކްއސާއި ނޫސްވެރިއާ އަނީސާ ޝަހީދުއެވެ.
ތާލިބާނުން އަފްޣާނިސްތާންގެ ވެރިކަން ހޯދިއިރު ބުނެފައި ވަނީ އަންހެން ކުދިން ސުކޫލަށް ދިއުމަށް ހުރަސް ނާޅާނެ ކަމަށާއި އަންހެން ކަނބަލުން ވަޒީފާއަށް ނެރޭނެ ކަމަށެވެ. ނަމަވެސް ތާލިބާނުން ވަނީ ފަހުން މިވާހަކައާ ޚިލާފަށް އަމަލު ކޮށްފައެވެ.
