ރާއްޖޭގައި އޮޕަރޭޓްކުރަމުންދާ ސަފާރީތަކުގެ ތެރެއިން %75 ސަފާރީއަކަށް އަލުން ޙިދުމަތް ދިނުމުގެ ހުއްދަ ލިބިފައިވާކަމަށް ނޭޝަނަލް ބޯޓިންގ އެސީސިއޭޝަން އޮފް މޯލްޑިވްސްއިން ބުނެފިއެވެ.
މިނިސްޓްރީ އޮފް ޓޫރިޒަމް އިން ބުނީ އިއްޔެގެ ނިޔަލަށް 120 ސަފާރީއަކަށް ހުއްދަ ދޫކޮށްފައިވާ ކަމަށެވެ .
ސަފާރީތައް ހުޅުވުމުގެ ހުއްދަ ޓޫރިޒަމް މިނިސްޓްރީން ދީފައިވަނީ ޖުލައި 15 ވަނަ ދުވަހުއެވެ. ސަފާރީތަކަށް ހުއްދަ ދެނީ ވަކި ޙާއްސަ ކަންތައްތަކަކަށް ބެލުމަށްފަހުގައެވެ. އެގޮތުން ސަފާރީތަކުން ހުއްދައަށް އެދޭއިރު ޓޫރިޒަމް މިނިސްޓްރީއަށް ޑެކްލަރޭޝަން ފޯމާއި، އޮޕަރޭޓިންގ ލައިސަންސްއާއި، މީރާގެ ޓެކްސް ކްލިއަރެންސް ފޯމާއި، އެ ސަފާރީއަކުން ސަލާމަތާއި ރައްކާތެރިކަމުގެ މިންގަނޑުތައް ގެންގުޅޭނެ ގޮތުގެ ޕްލޭނެއް ހުށަހަޅަންޖެހެއެވެ. ޓޫރިޒަމް މިނިސްޓްރީން ހުއްދަދެނީ މިހުރިހާ ކަންކަމަކަށް ރިއާޔަތް ކުރުމަށްފަހުއެވެ.
ޓޫރިޒަމް މިނިސްޓްރީގެ ޙުއްދަ ނުލިބެނީސް އެއްވެސް ސަފާރީއަކުން ފަތުރުވެރިންނަށް ޙިދުމަތްދީގެން ނުވާނެކަމަށް ބޯޓިން އެސޯސިއޭޝަނުން ސަފާރީތަކަށް ވަނީ އަންގާފައެވެ.
