ހަރުކަށި ފިކުރުގެ މީހުން ބޭނުންވަނީ އަންހެނުން ގޭގައި "ނޯކިރީ" ކުރަން ބައި ތިއްބަން ކަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާއި ގުޅޭ ގޮތުން މަޖިލީހަށް ހުށައެޅި ކުއްލި މައްސަލައާއި ގުޅިގެން ވާހަކަފުޅު ދައްކަވަމުންނެވެ.
"އައިމިނަތު ވާހީދާއަށް ހަމަލާދިން މައްސަލަ، މި މައްސަލައާއި ގުޅިގެން އުފެދިފައި މިވާ ފުޅާ ސުވާލަކީ ހަރުކަށި ފިކުރުގެ މީހުން ބޭނުންވާ ބޭނުމެއް، އަންހެނުން ގޭގައި ބައިތިއްބާ، ހަމައެކަނި ޖިންސީ އެދުން ފުއްދުމަށާއި ކިރުމައިންގެ ގޮތުގައާއި އަދި ދަރިން ބަލާ، ގޭގައި ނޯކިރީ ކުރާ ބައެއްގެ ގޮތުގައި ބޭތިއްބުމަށް. މި ފިކުރުގެ ބައްޓަމަށް ދިވެހި މުޖުތަމައު އެނބުރުމަށް ބަޔަކު ބިރު ދައްކައިގެން ބާރުގެ ބޭނުންކޮށްގެން އިންތިޒާމްވެގެން ހިނގަމުން އަންނަ މަސައްކަތެއް. އިއްޒަތްތެރި މެމްބަރުން އައްސަވާ ސުވާލަކީ އެ އިންތިޒާމުގައި ދައުލަތުގެ މުއައްސަސާތަކުން ބައިވެރިވަނީތޯއޭ. އެއީ ކަންބޮޑުވުން ބޮޑުވާ އިތުރު ސަބަބެއް"
މާލޭގައި ޓެކްސީ ކުރަމުންދާ ހަމައެކަނި އަންހެން ޑްރައިވަރު ކަމަށްވާ އައިމިނަތު ވަހީދާގެ ޓެކްސީއަށް އެކި ފަހަރު މަތިން ގެއްލުންދީފައިވާތީ އެކަމާއި ގުޅޭ ގޮތުން މަޖިލީހަށް ހުށައެޅި ކުއްލި މައްސަލައާއި އެކު މެދު ހެންވޭރު ދާއިރާގެ މެމްބަރު އަލީ އާޒިމްގެ ފާޑުކިއުން ފުލުހުންގެ މުއައްސަސާއަށް އަމާޒުވެއްޖެއެވެ.
މި މައްސަލަ މަޖިލީހުގެ ސަމާލުކަމަށް ގެނެސް، މަޖިލީހުގައި ވާހަކަދައްވަމުން އެމްޑީޕީގެ ޕީޖީ ލީޑަރު އާޒިމް ވިދާޅުވީ އައިންތުގެ ކާރަށް ގެއްލުންދިން މައްސަލަ ފަސް ފަހަރެއްގެ މަތިން ފުލުހުންނަށް ހުށައެޅިއިރު އެ މައްސަލަ ބަލާފައި ނުވުމަކީ އެ އިދާރާގެ މައްސަލައެއް ކަމަށެވެ.
ރައީސް ނަޝީދު ވިދާޅުވީ ހަރުކަށި ފިކުރަށް ދިވެހި މުޖުތަމައު އަނބުރާލުމަށްޓަކައި ބާރުގެ ބޭނުންކޮށްގެން ބަޔަކު މަސައްކަތް ކުރާ ކަމަށެވެ. އަދި މި ފަދަ މައްސަލަތަކުގައި ދައުލަތުގެ މުއައްސަސާތައް ވެސް ޝާމިލުވޭތޯ ސުވާލު އުފައްދަމުންދާކަން ފާހަގ ކުރައްވާ މިއީ ކަންބޮޑުވާ ކަމެއް ކަމުގައި ރައީސް ނަޝީދު ވިދާލުވިއެވެ.
