އިނގިރޭސި ޕްރިމިއަރ ލީގުގައި މިރޭ މަޝްހޫރު މެންޗެސްޓަރ ޔުނައިޓެޑުގެ މައްޗަށް ކްލައުޑިއޯ ރަނިއޭރީގެ ވޮޓްފޯޑުން 4-1 އިން އަމިއްލަ ދަނޑުގައި ކުރި ހޯދައި މެން.ޔުނައިޓެޑް ލަދުގަންނުވާލައިފިއެވެ.
ވޮޓަފޯޑުން ގިނަ ހަމަލާތަކެއް އުފެއްދި މިމެޗުގައި އެޓީމުން ވަނީ ފުރަތަމަ ހާފުގައި ދެލަނޑު ކާމިޔާބު ކޮށްފައެވެ. ފުރަތަމަ ލަނޑު މެޗުގެ 28 ވަނަ މިނެޓުގައި ކާމިޔާބު ކޮށްދިނީ ޖޯޝުއާ ކިންގެވެ. ފުރަތަމަ ހާފް ނިމެން މިނެޓަކަށް ވެފައި ވަނިކޮށް ދެވަނަ ލަނޑު ޖެހީ އިސްމައިލާ ސަރްއެވެ.
އެކަމަކު ދެވަނަ ހާފް ފަށައިގެން މާގިނައިރުތަކެއް ނުވެ މިޑްފީލްޑަރު ޑޮނީ ވެންޑަބީކުގެ ލަނޑުން މެންޗެސްޓަރ ޔުނައިޓެޑުން ފަރަގު ކުޑަ ކުރުމުން މެން.ޔުނައިޓެޑް ކޮޅަށް މެޗް އެނބުރިދާނެ ކަމަށް ބެލެވިފައި ވަނިކޮށް އެޓީމަށް މައްސަލަ ދިމާވީ 69 ވަނަ މިނެޓުގައި ކެޕްޓަން އަދި ޑިފެންޑަރު ހެރީ މެގޫއަށް ރަތްކާޑް ދައްކާ ފޮނުވާލުމުންނެވެ.
މީގެ ފައިދާ ނަގައި ވޮޓަފޯޑުން އިތުރު ދެލަނޑު ޖަހައި ޔުނައިޓެޑް ލަދު ގަންނުވާލީ މެޗުގެ އިތުރު ވަގުތުގައެވެ. މިދެލަނޑު ކާމިޔާބު ކޮށްދިނީ ޖައޯ ޕެޑްރޯ އާއި އެމެނުއަލް ބޮނަވެންޗާއެވެ.
މިއީ މިސީޒަނުގައި ޕްރިމިއަރ ލީގުގައި މެން.ޔުނައިޓެޑުން ކުޅުނު 12 މެޗުގެ ތެރެއިން ބަލިވި 5 ވަނަ މެޗެވެ. ފަސް މެޗުން މޮޅުވެވުނުއިރު އަނެއް ދެމެޗް ނިމުނީ އެއްވަރުވެގެންނެވެ. މި 12 މެޗުގައި 20 ލަނޑު ޔުނައިޓެޑުން ކާމިޔާބު ކުރިއިރު ބައިކޮޅަށް ވަނީ 21 ލަނޑު ވަދެފައެވެ. މިނަތީޖާތަކާއެކު 17 ޕޮއިންޓާއެކު މެން.ޔުނައިޓެޑް އޮތީ 7 ވަނައިގައެވެ.
މިސީޒަނަށް ބޮޑު ހޭދައެއް ކޮށްގެން ތައްޔާރުވި މެން.ޔުނައިޓެޑަށް އެކަށީގެންވާ ނަތީޖާތަކެއް ނުނެރެވޭތީ ކޯޗް އޮލަގުނަ ސޯލްޝެއާ މަގާމުން ވަކިކުރުމަށް މީގެ ކުރިންވެސް ސަޕޯޓަރުން ވަނީ ގޮވާލާފައެވެ. މިރޭ ވޮޓަފޯޑް އަތުން ބަލިވުމާއެކު ސޯލްޝެއާ މަގާމުން ވަކިކުރާނެ ކަމަށް ވަރަށް ބޮޑަށް ބެލެވެއެވެ.
ޕްރިމިއަރ ލީގުގައި މިރޭ ކުޅުނު އެހެން މެޗުތަކަށް ބަލާއިރު ތާވަލުގެ ކުރީގައި އޮތް ޗެލްސީ ވަނީ 3-0 އިން ލެސްޓަރ ސިޓީ ބަލިކޮށްފައެވެ. އެސްޓަންވިލާއިން 2-1 އިން ބްރައިޓަން ބަލިކުރިއިރު ނޯވިޗް ސިޓީއިން ވަނީ 2-1 އިން ސައުތެމްޓަމްގެ މައްޗަށް ކުރި ހޯދާފައެވެ. ބާންލީ އާއި ކްރިސްޓަލް ޕެލަސް ބައްދަލު ކުރި މެޗް 3-3 އިން އެއްވަރުވިއިރު ހަމަ މިނަތީޖާއިން ނިއުކާސަލް އާއި ބްރެންޓްފޯޑް ބައްދަލު ކުރި މެޗް ވެސް ނިމުނީ އެއްވަރު ވެގެންނެވެ.
