ޓައިވާނަކީ ދައުލަތެއް ކަމަށް ލިތުއޭނިއާއިން ބަލައިގެންފައިވާތީ، ޗައިނާގެ ކަސްޓަމްސް އިދާރާގެ ޑޭޓާބެސްއިން ލިތުއޭނިއާ ޑިލީޓް ކޮށްފިއެވެ. ލިތުއޭނިއާއިން އެކްސްޕޯޓް ކޯށްފައިވާ ލަކުޑިއާއި އެނޫން އެތައް އެހެން މުދަލެއްގެ ކޮންޓެއިނާތަކެއް ވަނީ ޗައިނާއަށް އެތެރެ ނުކުރެވޭ ގޮތް ވެފައެވެ.
ލިތުއޭނިއާގެ އެކްސްޕޯޓް ކުރާ ފަރާތްތަކުން ބުނާ ގޮތުގައި ޗައިނާގެ ކަސްޓަމްސްގެ ރެކޯޑްތަކުގައި ލިތުއޭނިއާ ނަމަކަށް ކިޔާ ގައުމެއް މިހާރަކު ނެތެވެ.
ލިތުއޭނިއާއިން ބުނާ ގޮތުން ޗައިނާގައި އޮޕަރޭޓް ކުރާ އެގައުމުގެ ކުންފުނިތަކަށްވެސް މިކަމުން އަސަރު ކުރާނެއެވެ. އަދި ޗައިނާގެ އިދާރަތަކުން މިކަން ހިނގައިގެން އުޅެނީ ކިހިނެއްކަން ސާފުކުރުމަށް ލިތުއޭނިއާއިން ވަނީ މަސައްކަތް ފަށާފައެވެ.
ލިތުއޭނިއާއިން ވަނީ ޔޫރަޕްގެ އިއްތިހާދުގެ ސަމާލުކަމަށްވެސް މިމައްސަލަ ގެނަސްފައެވެ.
ނޮވެމްބަރު 21 ން ފެށިގެން ޗައިނާއިން ވަނީ އެގައުމާއި ލިތުއޭނިއާގެ ގުޅުމުގެ ފެންވަރު ދަށްކޮށްފައެވެ. ލިތުއޭނިއާއިން ވަނީ ޓައިވާން ތަމްސީލުކުރާ އޮފީހެއް ވެރިރަށުގައި ހުޅުވުމަށް ފުރުސަތު ދިނުމަށްފަހު، ޓައިޕެއިގައިވެސް އެފަދަ އޮފީހެއް ހުޅުވާފައެވެ.
