ނުކުޅެދުންތެރިކަން ހުންނަ ކުދީންނާ އޮފީސް މާހައުލުގައި ވެސް ވަރަށް ގާތް ގުޅުމެއް ބާއްވާ ކަމަށް ފެނަކަ ކޯޕަރޭޝަންގެ މެނޭޖިންޑިރެކްޓަރ އަޙުމަދު ސައީދު މުހައްމަދު ވިދާޅުވެއްޖެއެވެ.
ސައީދު މިހެން ވިދާޅުވީ ނުކުޅެދުންތެރިކަން ހުންނަ ފަރާތްތަކުގެ ހައްޤުގައި، އިޙުސާންތެރިކަމާއި އޯގާތެރިކަން އިސްކޮށް ފެނަކައިން ކުރަމުންދާ އިޚުލާސްތެރި މަސައްކަތުގެ ސަބަބުން އެކުންފުންޏަށް ރިވެލި އެވޯޑު ލިބުމާ ގުޅިގެން ވާހަކަ ދައްކަވަމުންނެވެ.
މި އެވޯޑު ލިބިވަޑައިގެންނެވުމުން ސަޢީދު ވިދާޅުވީ އެއީ އިހުސާންތެރިކަމާއި އޯގާތެރިކަމާއެކު ކުރާ އިޚްލާސްތެރި މަސައްކަތުގެ އަލިގަދަ ހެއްކެއް ކަމަށެވެ.
ސަޢީދު ވިދާޅުވީ މި ދުވަސްވަރު އެންމެ ބޮޑު ގޮމްޖެހުމަކަށް ދިމާވީ ކޮވިޑްގެ ބިރުވެރިކަން ކަމަށެވެ. "ކޮވިޑް 19 ގެ ބިރުވެރި ދަތިހާލުގައި ވެސް ނުކުޅެދޭ އެތައް އާއިލާތަކަށް ހިނިތުވުން ގެނެސްދީން. އެފަދަ އާއިލާތަކުގެ އިހުސާސްތައް ވަޒަންކުރެވޭތީ އެ ހިތްތަކަށް ތަސައްލީއެއް ހޯދައިދެވޭތޯ ކުރާކަމެއް. މިއީ އެވޯޑަކަށް ޓާގެޓް ކޮށްގެން ކުރާ ކަމެއްނޫން،" ސަޢީދު ވިދާޅުވިއެވެ. އޭނާ ވިދާޅުވީ "މިއީ އިންސާނީ ހައްގުތައް ކަށަވަރުކޮށްދިނުމަށް ކުރެވޭ މާތް މަހުސަދުގެ ކުޑަ މިންވަރެއް،" ކަމަށެވެ.
މި އެވޯޑަކީ މިނިސްޓްރީ އޮފް ޖެންޑަރ، ފެމެލީ އެންޑް ސޯޝަލް ސަރވިސަސްއާއި، ނުކުޅެދުންތެރިކަން ހުންނަ މީހުންގެ ހައްޤުތައް ހިމާޔަތްކުރާ ކައުންސިލާ ގުޅިގެން ކޮންމެ 2 އަހަރުން 1 އަހަރު ނުކުޅެދުންތެރިކަން ހުންނަ މީހުންނާއި، އެމީހުންގެ ލާބަޔަށް މަސައްކަތްކުރާ ފަރާތްތަކަށް ހިތްވަރު ދިނުމުގެ ގޮތުން ދޭ އެވޯޑެކެވެ. މި އެވޯޑު ފަނަކައަށް ލިބިވަޑައިގެންނެވީ، ނުކުޅެދުންތެރިކަން ހުންނަ މީހުންގެ ހާލަތު ރަނގަޅުކުރުމަށް އެހީތެރިކަން ފޯރުކޮށްދިނުމުގެ ދާއިރާއިންނެވެ.
ނުކުޅެދުންތެރިކަން ހުންނަ ފަރާތްތަކަކީ މުޖުތަމައުގައި ބޭނުންތެރި ބަލައިގަންނަ ބަޔަކަށް ހަދައި، އެފަރާތްތަކުގެ އެކިއެކި ހުނަރުތައް ތަރައްގީކުރުމަށް ފެނަކައިން ގެންދަވަނީ މަގުފަހިކޮށްދެމުންނެވެ. އޭގެ އިތުރުން އެ ހުނަރުތައް މަސައްކަތުގެ ދާއިރާގައި ބޭނުންކުރާނެ ފަހި ފުރުސަތުތަކެއް ތަނަވަސްކޮށްދިނުމަށާއި، އެފަދަ ފަރާތްތައް މުޖުތަމައުން އެކަހެރިކުރެވެމުން ދިޔަދިޔުން ނިމުމަކަށް ގެނެސް، އިންސާނީ ހައްޤުތަކުގެ ރޮނގުން އެފަރާތްތަކަށް ލިބެންޖެހޭ ހައްޤުތައް ލިބިދެވޭކަން ކަށަވަރުކުރުމުގެ ގޮތުން ގިނަ މަސައްކަތްތަކެއް ކުރައްވަމުން ގެންދަވާ ކަމަށް ވެސް ފެނަކައިން ވިދާޅުވިއެވެ. "މިގޮތުން މިކުންފުނިން ކޮންމެ ރަށެއްގައި ތިބި އެފަދަ ފަރާތްތައް ދެނެގަނެ، ކަމާގުޅޭ އިދާރާތްތައް މެދުވެރިކޮށް އެ ފަރާތްތަކުގެ މައުލޫމާތު ވަޒަންކޮށް، އެފަރާތަކަށް އެވަގުތައް ބޭނުންވާ އެންމެ އެކަށީގެންވާ އެހީތެރިކަން ފޯރުކޮށްދެމުންދާއިރު، އޭގެތެރޭގައި މައިގަނޑު ގޮތެއްގައި ހިމެނެނީ ކުންފުނިން އެފަރާތަކަށް އެންމެ އެކަށީގެންވާ ވަޒީފާއެއް ހަމަޖައްސައިދިނުން ނުވަތަ އެފަރާތެއްގެ ހުނަރު ތަރައްގީކުރުމަށް ބޭނުންވާ އެހީތެރިކަން ފޯރުކޮށްދިނުމެވެ. " ފެނަކައިން ވިދާޅުވެފައިވެއެވެ.
ނުކުޅެދުންތެރިކަން ހުންނަ މީހުންނަށް އެކުންފުނީން ވަޒީފާ ހަމަޖައްސައިދިނުމަށްފަހު އެފަރާތްތައް ވަޒީފާގައި ގެންގުޅޭއިރު، މުވައްޒަފުންނަށް ލިބިދޭންޖެހޭ ހައްޤުތައް ލިބިދިނުމުގައި އެއްވެސް މިންވަރަކަށް އެހެން މުވައްޒަފުންނާއި ތަފާތުކުރުން ނުގެންގުޅޭކަން ފަޚުރުވެރިކަމާއެކު ވަނީ ފާހަގަވެސް ކުރައްވައިފައެވެ. ކުރިޔަށް އޮތްތަނުގައި މިހާރަށްވުރެ ފުޅާ ދާއިރާއެއްގައި އެފަދަ ފަރާތްތަކަށް އެހީތެރިވެވޭނެ ގޮތްތަކެއް ރާވަމުންދާކަމަށް ވެސް ވިދާޅުވިއެވެ.
"ރިވެލި އެވޯޑްގެ ފަޚުރުވެރި އުފާ ލިބިގަންނަމުންދާ މިދަނޑިވަޅުގައި، ނުކުޅެދެންތެރިކަން ހުންނަ ފަރާތްތަކާ ގުޅިގެން މިކުންފުނިން ނިންމާ އެންމެހައި ނިންމުންތަކަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އަބަދުމެ ދެއްވަމުންގެންދަވާ އަގުހުރި ލަފަޔާއި އިރުޝާދު ފާހަގަކޮށް އެމަނިކުފާނަށް ނުހަނު އިޚުލާސްތެރިކަމާ އެކު ޝުކުރު ދަންނަވަމެވެ."
