އަފްޣާނިސްތާން އދގައި ތަމްސީލު ކުރާނީ ކުރީގެ ސަރުކާރުން އދއަށް ކަނޑައަޅާފައިވާ ދާއިމީ މަންދޫބު ކަމުގައި އދން ހަމަޖައްސައިފިއެވެ. ތާލިބާނުން ވަނީ އދގައި ހުންނަ އަފްޣާނިސްތާންގެ ގޮނޑި ތާލިބާން ސަރުކާރަށް ހޯދުމަށް އެދިފައެވެ. ނަމަވެސް އދގެ އާންމު މަޖިލީހުން ނިންމާފައި ވަނީ ކުރީގެ މަންދޫބު ޣުލާމް މުހައްމަދު އިސްހާގް ޒާއީ އެމަގާމުގައި ބެހެއްޓުމަށެވެ. އަދި ތާލިބާނަށް ގޮނޑި ނުދިނުމަށެވެ.
ތާލިބާނުން ވަނީ އދގައި ހުންނަ ތާލިބާންގެ ދާއިމީ މަންދޫބުގެ މަގާމަށް ސުހައިލް ޝާހީން ހަމަޖައްސާފައެވެ. އަދި އދގެ ނިންމުމަކީ އިންސާފުން ބޭރުން ކޮށްފައިވާ ކަމެއް ކަމަށް ބުނެފައެވެ.
މީގެ އިތުރުން ވެނެޒުއެލާއާއި މިޔަންމާރގެ ދާއިމީ މަންދޫބުންގެ ގޮތުގައި އެގައުމުތަކުގެ ކުރީގެ ސަރުކާރުން އައްޔަން ކޮށްފައިވާ މަންދޫބުން ތަމްސީލު ކުރުމަށްވެސް ނިންމާފައި ވެއެވެ. އދއާއި މިޔަންމާގެ ގޮނޑިއާ މެދު ދެން ގޮތެއް ކަނޑައަޅާނީ 2022ގައި ކަމަށްވެސް ނިންމާފައި ވެއެވެ.
