ސިޔާސީ ހަރަކާތްތައް އިތުރަށް ފުޅާކުރަން ކުރީގެ ރައީސް އަބްދުﷲ ޔާމީން ޕީޕީއެމް/ޕީއެންސީގެ އިސް ބޭފުޅުންނާއި މިރޭ މަޝްވަރާކުރައްވައިފި އެވެ.
ޔާމީން މިކަމާ ގުޅޭގޮތުން މަޝްވަރާ ކުރެއްވީ މިރޭ ޕީޕީއެމް/ޕީއެންސީގެ ކައުންސިލްގެ މެމްބަރުންނާއި ލީގަލް ޑިޕާޓްމެންޓްގެ ބޭފުޅުންނާއެކު ބޭއްވި ބައްދަލުވުމެއްގަ އެވެ.
ޕީޕީއެމްގެ ތަރުޖަމާނު ހީނާ ވަލީދު ވިދާޅުވީ މި ބައްދަލުވުމުގައި ސިޔާސީ ހަރަކާތްތައް އިތުރަށް ފުޅާކުރުމާއި ބެހޭ ގޮތުންނާއި އަދި އިންޑިއާ މިލިޓަރީ އައުޓް ކެމްޕޭން ކުރިއަށް ގެންދިޔުމާ ބެހޭ ގޮތުން މަޝްވަރާ ކުރެވުނު ކަމަށެވެ.
މަނީ ލޯންޑަރިންގެ ދައުވާ ސާބިތު ނުވާ ކަމަށް ސުޕްރީމް ކޯޓުން މިދިޔަ ހަފްތާގައި ހުކުމް ކުރުމާ ގުޅިގެން ޔާމީން ވަނީ އަލުން ސިޔާސީ މަސައްކަތްތައް ކުރައްވަން ފައްޓަވާފަ އެވެ. އެގޮތުން އިދިކޮޅުގެ މަސައްކަތް އިތުރު ގިޔަރަކަށް ޖައްސަވާނެ ކަމަށް ޔާމީން ވަނީ ދާދިފަހުން ވަނީ ވިދާޅުވެފަ އެވެ.
ޔާމީން އާއެކު އިދިކޮޅުން މިދިޔަ ހުކުރު ދުވަހުގެރޭ މާލޭގައ ބޮޑު ޖަލްސާއެއް ބާއްވާފައިވާއިރު، އަންނަ ހުކުރު ދުވަހުގެރޭ ޔާމީނާއެކު ހުޅުމާލޭގައި ބޮޑު ޖަލްސާއެއް ބޭއްވުމަށް ވެސް އިދިކޮޅުން އަންނަނީ ތައްޔާރުވަމުންނެވެ.
