އަނިޔާގައި ދުވަސްތައް ގުނަމުންދާ ތަޖުރިބާކާރު ވިންގަރ އެޑިން ހަޒާޑަށް ވެސްޓްހޭމް ޔުނައިޓެޑުން ހުށަހެޅި 25 މިލިޔަން ޔޫރޯއަށް ރެއާލް މެޑްރިޑުން ނޫނެކޭ ބުނެފިއެވެ.
ޗެލްސީއަށް ކުޅެމުން ދަނިކޮށް 2019 ވަނަ އަހަރު ރެއާލްއިން ބޮޑު އަގުގައި ގެނައި ހަޒާޑަށް އަނިޔާގެ ސަބަބުން ގިނަ މެޗުތަކެއް ގެއްލިފައިވާއިރު ކުރިއަށް އޮތް ޖެނުއަރީ ޓްރާންސްފާގައި އޭނާ ދޫކޮށްލަން ރެއާލްއިން ބޭނުންވާ ކަމަށް މީޑިޔާ ރިޕޯޓުތައް ބުނެއެވެ. އެކަމަކު ހަޒާޑުގެ ޓްރާންސްފާ ފީގެ ގޮތުގައި އެންމެ މަދުވެގެންވެސް 50 މިލިޔަން ޔޫރޯ ރެއާލްގެ ރައީސް ފްލޮރެންޓީނޯ ޕެރޭޒް ބޭނުންވެއެވެ.
ޕްރިމިއަރ ލީގުގެ ގަދަ ހަތަރަކަށް މިސީޒަނުގައި ވާދަކުރަމުން އަންނަ ވެސްޓްހޭމްއިން ހަޒާޑަށް ރެއާލްއިން ޑިމާންޑް ކުރާ ވަރުގެ ޓްރާންސްފާ ފީއެއް ދޭނެކަމަށް ނުބެލެވޭއިރު ހަޒާޑް،30، ޔޫރަޕުގެ ބޮޑު އެއްވެސް ކްލަބަކުން އޭނާއަށް ޝައުގުވެރިކަން މިހާތަނަށް ފާޅުކޮށްފައެއް ނުވެއެވެ.
ޑޭވިޑް މޮއިސްގެ އިރުޝާދުގެ ދަށުން ޕްރިމިއަރ ލީގުގައި މިސީޒަނުގައި މަޝްހޫރު ހުރިހާ ކްލަބެއް ބަލިކޮށްފައިވާ ވެސްޓްހޭމްއިން ދަނީ ހަޒާޑުގެ އިތުރުން ގިނީގެ އުއްމީދީ ފޯވާޑް މުހައްމަދު ބަޔޯގެ ސޮއި ހޯދުމަށްވެސް މަސައްކަތް ކުރަމުންނެވެ.
