ޗެލްސީ ޑިފެންސް ލައިނުގެ މައި އެއްތަނބު، ޖަރުމަނުގެ އެންޓޯނިއޯ ރުޑިގާ ގެނައުމަށް ސްޕެއިނުގެ ގަދަ ބާރު ރެއާލް މެޑްރިޑުން މަސައްކަތް ފަށައިފިއެވެ.
ޖަރުމަނު ގައުމީ ޓީމުގައިވެސް މުހިއްމު ދައުރެއް އަދާކުރާ ރުޑިގާ، ޗެލްސީއާއެކު ހަދާފައިވާ ކޮންޓްރެކްޓް އަންނަ އަހަރުގެ ޖޫން މަހު ހަމަވާއިރު ރެއާލްގެ އަމާޒު ހުރީ ދަނޑިވަޅުގެ ބޭނުން ހިފައި ޗެލްސީއަށް ޓްރާންސްފާ ފީއެއް ނުދީ ރުޑިގާ ގެނައުމަށެވެ. ޗެލްސީގެ ކޯޗް ތޯމަސް ޓުޗެލްގެ އެންމެ ބޮޑު އަމާޒަކީ ޖޫންގެ ކުރިން ރުޑިގާގެ ކޮންޓްރެކްޓް އާކުރުމެވެ. ކޮންޓްރެކްޓް އާކުރުމުގެ މަޝްވަރާތައް ފެށިފައި ވީނަމަވެސް އަދި ވަކިކޮޅެއްގައި ޖެހިފައެއް ނުވެއެވެ.
ރުޑިގާ،28، ގެނައުމަކީ ރެއާލްގެ މައިގަނޑު އަމާޒު ކަމަށް ސްޕެއިނުގެ މަޝްހޫރު ނޫސް "މާކާ" އިން ބުނެފައިވާއިރު ޗެލްސީން މިހާރު ދަނީ ހަންގޭރީގެ "ވެންޑައިކް" ގެ ނަމުން މަޝްހޫރުވެފައިވާ ޑިފެންޑަރު އަޓިއްލާ ޒަލައި ކުރިއަށް އޮތް ޖެނުއަރީ ޓްރާންސްފާގައި ގެނައުމަށް މަސައްކަތް ކުރަމުންނެވެ.
ރެއާލްއިން މިދިޔަ ސީޒަން ނިމުމާއެކު ކެޕްޓަން ސާޖިއޯ ރާމޯސް ދޫކޮށްލުމަށްފަހު، ހިލޭ ޓްރާންސްފާއެއްގެ ދަށުން ބަޔާން މިޔުނިކުގެ ޑިފެންޑަރު ޑޭވިޑް އަލަބާވެސް އެކްލަބަށް ގެނެސްފައެވެ.
