ރޫބީނާ ވަނީ އިންޑިއާގެ ޖާމިއާ މިއްލިއްޔާ ޔުނިވަރސިޓީގައި އޭނާގެ ޕީއެޗްޑީ ހެދުމުގެ މަސައްކަތް ފަށާފައެވެ. ދިއްލީގެ ޒުވާން އަންހެނާގެ ވާހަކަ މީޑިއާއިން ރިޕޯޓް ކޮށްފައި ވަނީ އޭނާއަށް އީޖާދީ އުފެއްދުތެރިކަމަށް ދޭ އިންޑިއާގެ ބޮޑު ވަޒީރުގެ ސްކޯލާޝިޕެއް ލިބުނާ ގުޅިގެންނެވެ. ޖާމިއާ މިއްލިއްޔާ އިސްލާމިއްޔާގެ އެތައް ޕީއެޗްޑީ އެޕްލިކެންޓުންގެ ތެރޭން ހޮވގެން ޕްރައިމިނިސްޓަރ ސްކޯލާޝިޕް ހޯދާފައިވާ ރޫބީނާއަކީ، އަމިއްލަ ސްކޫލުތަކުގައި ސާނަވީއަށް ކިޔަވައި ބެޗެލާޒް އިން ޓެކްނޮލޮޖީގެ ރޮނގުން ފަސްޓް ޑިގްރީ ހެދުމަށް ސްކޯލާޝިޕެއް ލިބުނު ޒުވާޏެކެވެ. އެއަށްފަހު އޭނާގެ މާސްޓާޒްއަށްފަހު ޖާމިއާގައި އިލެކްޓްރިކަލް އިންޖިނޭރިންގ ގެ ރޮނގުން ޕީއެޗްޑީ ހެދުމަށް އޭނާއަށް ފުރުސަތު ލިބުނީއެވެ.
އޭނާ ޕީއެޗްޑީއަށް ލިޔާ މައުޟޫއަކީ، އިލެކްޓްރިކަލް އާލާތްތަކުގައި ބޭނުން ކުރާ ކެޕޭސްޓަރ މިހާރަށްވުރެން ސްމާޓް އެއްޗެއްގެ ގޮތުގައި އީޖާދު ކުރުމާ ބެހޭ ގޮތުންނެވެ. އޭނާގެ ޕީއެޗްޑީ ސުޕަރވައިޒަރ ޑރ. ތާރިގުލް އިސްލާމް ވިދާޅުވާ ގޮތުގައި މިއީ ބޭސްވެރިކަމުގެ ދާއިރާގައި، ބޭނުން ކުރެވިދާނެ މުހިންމު އާލާތެކެވެ. މީގެ ސަބަބުން މިސާލަކަށް ހަސްފަތާލު ކޮޓަރިއެއގެ ފިނި ހޫނުމިން ދުރުގައި ތިބެގެން ބަލައި މޮނީޓަރ ކުރެވިދާނެއެވެ.
ޕްރައިމިނިސްޓަރގެ ޕީއެޗްޑީ ރިސާޗް ސްކޯލާޝިޕް ގެ ދަށުން ރުބީނާއަށް ކޮންމެ މަހަކު ރިސާޗަށް 70 ހާސް ރުޕީސް ފަސް އަހަރު ދުވަހަށް ލިބޭނެއެވެ. އަދި އޭގެ އިތުރުން ކޮންމެ އަހަރަކަށް ފަސް އަހަރު ވަންދެން ދެ ލައްކަ ރުޕީސްވެސް ލިބޭނެއެވެ.
