ޕާކިސްތާންގެ ވެރިކަން ކުރާ ނިޒާމަކީ، އިސްލާމީ ނިޒާމެއް ނޫން ކަމަށް އަފްޣާނިސްތާންގައި ވެރިކަން ކުރާ ތާލިބާނުން ބުނެފިއެވެ. ތާލިބާނުން ބުނީ ޕާކިސްތާންގައި އޮންނަ ވެރިކަމުގެ ނިޒާމަކީ ބޭރުން ބަޔަކު ޕާކިސްތާނަށް މަޖުބުރުކޮށްފައިވާ ނިޒާމެއް ކަމަށެވެ.
ޕާކިސްތާންގެ ވެރިކަމުގެ ނިޒާމާ ބެހޭ ގޮތުން ވާހަކަ ދައްކަމުން، އަފްޣާން ތާލިބާން ސަރުކާރުގެ ތަރުޖަމާން ޒަބީހުﷲ މުޖާހިދު ބުނެފައި ވަނީ ޕާކިސްތާނަކީ އިސްލާމް ދީނަށް ވުރެން އިގްތިސާދީ މައްދީ ތަރައްގީއަށް އިސްކަން ދޭ ގައުމެއް ކަމަށެވެ.
މިއީ އަފްޣާން ތާލިބާނުން ކާބުލްގެ ސަރުކާރު ހިފި ފަހުން ޕާކިސްތާނާ ދެކޮޅަށް ވާހަކަ ދެއްކި ފުރަތަމަ ފަހަރެވެ.
ތާލިބާނުންގެ އަފްޣާނިސްތާނަކީ ދުނިޔޭގައި ދުސްތޫރެއްގެ އަސްލެއް ނެތި ވެރިކަން ކުރާ އެފަދަ ހަމައެކަނި ގައުމެވެ. ތާލިބާނު ސަރުކާރު ދުނިޔޭގެ އެއްވެސް ގައުމަކުން ބަލައިގެންފައެއް ނުވެއެވެ.
