ސްރީލަންކާއަށް ދިމާވެފައިވާ ދަރަނީގެ ދަންތުރައިން ސަލާމަތް ކޮށްދިނުމަށް، އެގައުމުގެ މާލީ ވަޒީރު އިންޑިއާއިން އެދިވަޑައިގެންފިއެވެ. ރައީސްއާއި ބޮޑު ވަޒީރުގެ ކޮއްކޯފުޅު، މާލީ ވަޒީރު ބެސިލް ރާޖަޕަކްސަ މަގާމާ ހަވާލުވެ ވަޑައިގަތް ފަހުން އޭނާ ވަނީ މާލީ ގޮތުން އިންޑިއާއާ ގާތް ގުޅުމެއް ގާއިމު ކުރެއްވުމަށް މަސައްކަތް ފައްޓަވާފައެވެ. ބެސިލް ރާޖަޕަކްސަ ވަނީ ނިއުދިއްލީއަށް ޒިޔާރަތް ކުރައްވައި މަޝްވަރާތައް ބާއްވަވާފައެވެ.
ސްރީލަންކާއަކީ ޗައިނާއިން ގިނަ އަދަދަކަށް ލޯން ނަގާފައިވާ ގައުމެކެވެ. ސްރީލަންކާއަށް ޗައިނާއިން ބޮޑު އަގުގައި ލޯނު ދީފައި ވުމުން ބޮޑު އިންޓަރެސްޓަކާއެކު ލޯނުތައް ދައްކަމުން ގެންދެއެވެ.
އިންޑިއާގެ ސްޓްރެޓީޖިކް ނުފޫޒު ފޯރާ ދާއިރާގައި އޮންނަ ސްރީލަންކާއިން ޖިއޯޕޮލިޓިކްސްގެ ތެރެއަށް ޗައިނާ ވެއްދުމުން އެމެރިކާއާއި އިންޑިއާއިން ވަނީ އެކަމާ ދެކޮޅު ހަދާފައެވެ.
އިންޑިއާއިން ބުނަނީ ސްރީލަންކާއިން ހަމަޖެހޭ ޚާރިޖީ ސިޔާސަތެއް ނު ގެންގުޅޭ ކަމަށެވެ.
