ލިޔެވިފައިވާ ގާނޫނެއް ނެތި އަފްޣާނިސްތާނުން އަމަލު ކުރަމުން ދަނީ ތާލީބާންގެ ވެރިޔާ ނެރެމުން ގެންދާ ގަރާރުތަކުންނެވެ. ތާލިބާން ސަރުކާރުން ވަނީ އަންހެނުންނާ ބެހޭ މުހިންމު ގަރާރެއް ނެރެފައެވެ. މި ގަރާރުގައި އަންހެނުން ބާރުވެރި ކުރުމަށް ބައެއް ފިޔަވަޅުތައް އަޅާފައި ވެއެވެ.
ތާލިބާންގެ މުއްލާގެ ގަރާރަށް އިންސާނީ ހައްގާ ބެހޭ އދގެ ހިއުމަން ރައިޓްސް ކޮމިޝަނަރގެ އޮފީހުން ވަނީ މަރުހަބާ ކިޔާފައެވެ. ނަމަވެސް އެ އޮފީހުން ބުނެފައި ވަނީ މި ގަރާރުގައި ބަޔާންކޮށްފައިވާ ކަންކަމަށް ވުރެން އިތުރު ފިޔަވަޅުތަކެއް، އަންހެނުންގެ ހައްގުތައް ހިމާޔަތް ކުރުމަށް އަފްޣާނިސްތާނުން އަޅަން ޖެހޭނެ ކަމަށެވެ.
ހިއުމަން ރައިޓްސް ކައުންސިލުން ބުނެފައި ވަނީ އަންހެނުންނަށް އާމްދަނީ ހޯދުމާއި ވަޒީފާގެ ފުރުސަތުން ތާލިބާނުން މަހުރޫމް ކުރަނީނަމަ، އެއީ އާބާދީގެ ބޮޑު ބަޔަކަށް އާމްދަނީ ހޯދުމުން މަހުރޫމް ކުރެވެނީ ކަމަށެވެ. އަދި އެހެން ވެއްޖެނަމަ، ގާތްގަނޑަކަށް އެއް ބިލިއަން ޑޮލަރަށް ވުރެން ބޮޑު އާމްދަނީއެއް އަފްޣާނިސްތާނަށް ގެއްލިގެންދާނެ ކަމަށެވެ. އެއީ އަފްޣާނިސްތާންގެ ޖީޑީޕީގެ ފަސް ޕަސެންޓެވެ.
