އެއް ދުވަހެއްގައި ހިނގާފައިވާ ތާރީޚީ ދެ ހާދިސާއަކުން ޕާކިސްތާންގެ ތާރީޚް ކިޔާލެވެއެވެ. ދެ ހާދިސާ ހިނގާފައި ވަނީ 16 ޑިސެމްބަރުގައެވެ.
16 ޑިސެމްބަރު 1971 އަކީ ޕާކިސްތާނުން ވަކިވެ، ބަންގްލަދޭޝް މިނިވަން ދައުލަތެއްކަމަށް އިއުލާން ކުރި ދުވަހެވެ. ސުންނީ މުސްލުމު ދެ އާބާދީއެއް، އިރުމަތީ ޕާކިސްތާނާއި ހުޅަނގު ޕާކިސްތާން ގައި ދިރިއުޅުނެވެ. ނަމަވެސް ހުޅަނގު ޕާކިސްތާން މީހުން، އިރުމަތީ ޕާކިސްތާން މީހުންނަށް އެމީހުންގެ ހައްގުތައް ދޭކަށް ބޭނުމެއް ނުވިއެވެ.
ދީނީގޮތުން އެއް އަގީދާއެއް ގަބޫލުކުރިއަސް، ތިމާމެންގެ އަމިއްލަ ވަންތަކަމާއި ހައްގު ލިބިގަތުމަކީ ކޮންމެ ބަޔަކުވެސް ބޭނުންވާނެ ކަމެއްކަން، ޕާކިސްތާންގެ ބާރގެ ދަށުން މިނިވަން ވުމަށް ބަންލްގަދޭޝް ބޭނުންވި ހާދިސާއިން ސާބިތުކޮށްދެއެވެ.
ބަންގްލަދޭޝްގައި ހިންގާފައިވާ ގަތުލުއާންމާއި އަންހެނުން ރޭޕްކުރުމާއި ލާއިންސާނީ އަމަލުތަކަކީ، އިސްލާމް ދީނަށްޓަކައި އެއިރު އުފަންވި، އައު ދައުލަތުގެ ހުދު ފޭރާމުގައި މިއަދާހަމައަށްވެސް އަބަދުގެ އަބަދަށް ޖެހިފައިވާ ލައްގަނޑެކެވެ.
ޕާކިސްތާން ސިފައިން ބަންގްލަދޭޝްގައި ހިންގާފައިވާ ލާއިންސާނީ އަމަލުތަކަކީ ބަންގްލަދޭޝްގެ ހަނގުރާމައިގައި ބަލި ގަބޫލުކޮށް އިންޑިއާ ސިފައިންނާ ބަންގްލަދޭޝް ހަވާލުކުރުމުގެ އެއްބަސްވުމުގައި ސޮއިކުރެއްވި ޖެނެރަލް ނިޔާޒީގެ ހަނދާންތަކާ ބެހޭ ފޮތުގައ ޑޮކިއުމެންޓްކޮށްފައިވާ ކަންކަމެވެ.
ޖެނެރަލް ނިޔާޒީއާއި އޭނާގެ ބައިވެރިންނަށް އެހީތެރިވެދިނީވެސް އިސްލާމީ ޖަމާއަތެކެވެ. ބަންގްލަދޭޝްގެ ޖަމާއަތޭ އިސްލާމީގެ ބައެއް ލީޑަރުން ހިންގާފައިވާ ގަތުލުއާންމުތަކަށް އެމީހުން ދައްޖައްސާފައިވެސް ވެއެވެ.
16 ޑިސެންބަރު 1971ގައި ޕާކިސްތާންގެ އިސްލާމީ ހަމަތަކުގެ ދެފުށްދެގޮތް ހާމަވިނަމަވެސް ޖެނެރަލް ޒިއާއުލް ހައްގު ވަނީ ޕާކިސްތާންގައި އިސްލާމީ ޝަރީއާގެ ނަމުގައި ޑިކްޓޭޓާޝިޕެއް ހިންގާފައެވެ. ހައްދުފަހަނައަޅާފައިވާ ހަރުކަށި ފިކުރަށް ވާގި ލިބިގެން ދިޔައެވެ. މުޅި މުޖުތަމައަށް މި ފިކުރު ފެތުރިގެންދިޔައެވެ.
މީގެ ނަތީޖާ ފެނިގެން ދަނީ ޕާކިސްތާންގެ އިސްލާމީ ހަރުކަށިކަން ހާމަވެގެންދާ ދެވަނަ ހާދިސާއިންނެވެ. 2014 ވަނައަހަރުގެ 16 ޑިސެންބަރުގައި ސްކޫލަކަށް ހަލަދީ، ޅަ ފުރައިގެ 130 ކުދިންގެ ގަތުލުއާންމެއް ހިންގާލި ހާދިސާއިންނެވެ.
ޕާކިސްތާނުގެ ތާލިބާނުން ހިންގާފައިވާ މިޖަރީމާއަކީ ސިފައިންނަށް ބަދަލު ހިފުލުމުގެ ގޮތުން ހިންގާފައިވާ ޖަރީމާއެކެވެ. ޕާކިސްތާން ތާލިބާނަކީ ޕާކިސްތާން ސިފައިންގެ އުފެއްދުމެކެވެ.
މުހައްލިލުން ބުނާ ގޮތުން ޕާކިސްތާންގައި އޮޕަރޭޓް ކުރާ ޓެރަރިސްޓް ޖަމާއަތްތަކުން ދައުލަތާއި ރައްޔިތުންނަށް އަމާޒު ކުރުމުން ޕާކިސްތާނުން ރައްދުގައި ފިޔަވަޅު އަޅައެވެ. ނަމަވެސް މި ފިޔަވަޅަކީ، ދެވަނަ ފަހަރަކަށްވެސް މިފަދަ ހަމަލައެއް އެ ޖަމާއަތަކުން އައިސްފާނެތީ އެކަން ހުއްޓުވުމަށް އަޅާފިޔަވަޅެއް ނޫނެވެ. އެހެނީ، ޕާކިސްތާންގެ ސިފައިންނާ ދައުލަތުގެ ބޭނުމަށް މި ޖަމާއަތްތައް ގެންގުޅެއެވެ. ނަމަވެސް މި ޖަމާއަތްތައް ރޫޅާލުމަށް ސަރުކާރުން ފިޔަވަޅެއް ނާޅައެވެ.
ޕާކިސްތާންގެ ތާލިބާނުންގެ ފުށުން ފެނިގެން ދަނީ މިފަދައިން ނެވެ. ތާލިބާނަކީ އެފަދަ އެހެން ޓެރަރިސްޓް ޖަމާއަތްތަކެކޭ އެއްފަދައިން ޕާކިސްތާންގެ ޚާރިޖީ ސިޔާސަތު ތަންފީޒު ކުރުމުގެ ވަސީލަތެކެވެ.
ޕާކިސްތާނު ސަރުކާރުން ވަނީ ތާލިބާނަށް މައާފްކޮށްފައި އެމީހުންނާއެކު މަޝްވަރާތައް ފަށާފައެވެ.
