ސަރަހައްދު ހުރަސްކޮށްދޭ ޓެރަރިސްޓް ހަމަލާތައް ކުށްވެރިކޮށް، އަފްޣާނިސްތާންގައި ހުރިހައި ފަރާތެއް ހިމެނޭ ސަރުކާރެއް އެކުލަވާލުމުގެ މުހިންމު ކަމަށް ބާރު އަޅަމުން މެދުތެރޭ އޭޝިއާގެ ގައުމުތަކުން ނިއުދިއްލީގައި ބެއްވި ބައްދަލުވުން ނިންމާލައިފިއެވެ. ސެންޓްރަލް އޭޝިއާގެ ފަސް ގައުމުން އިންޑިއާއާއެކު ބާއްވާފައިވާ ބައްދަލުވުމުގައި އެއްބަސްވީ، އަފްޣާނިސްތާނަށް އިންސާނީ އެހީދިނުމަށެވެ.
މިބައްދަލުވުމުގައި ތާޖިކިސްތާނާއި ކަޒަޚިސްތާނާއި އުޒުބެކިސްތާނާއި ކިރިގީޒިސްތާނާއި ތުރުކުމާނިސްތާންގެ ޚާރިޖީ ވަޒިރުން ބައިވެރިވެ ވަޑައިގަތެވެ.
މި ބައްދަލުވުން ނިންމާލި އިރު ޖެނުއަރީގައި ސެންޓްރަލް އޭޝިއަން ގައުމުތަކާއި އިންޑިއާއެކު ބާއްވާ ސަމިޓް ބައްދަލުވުމަށްވެސް އެއްބަސްވެފައި ވެއެވެ.
ބެލެވޭ ގޮތުގައި އިންޑިއާގެ ޖުމްހޫރީ ދުވަހުގެ އިހުތިފާލުތަކުގައި ޝަރަފްވެރި މެހުމާނުންގެ ގޮތުގައި މި ފަސް ގައުމުގެ ވެރިން ބައިވެރިވެ ވަޑައިގަންނަވާނެއެވެ.
އިންޑިއާގެ ޚާރިޖީ ވަޒީރު އެސް ޖަޔަޝަންކަރު ވިދާޅުވިގޮތުގައި އިންޑިއާއިން މަސައްކަތް ކުރަމުން ދަނީ އިންޑިއާއާއި ސެންޓްރަލް އޭޝިއަން ގައުމުތަކުގެ ދެމެދު އޮންނަ ގުޅުން އައު ހަރުފަތަކަށް ގެންދާށެވެ. އޭނާ ވިދާޅުވީ މި ގުޅުން ބިނާވެގެން ދަނީ ވިޔަފާރިއާއި ގައުމުތަކުގެ ކުޅަދާނަކަން އިތުރު ކުރުމަށާއި ގައުމުތައް ގުޅުވާލުމާއި، ގުޅުން ބަދަހި ކުރުމުގެ މައްޗަށެވެ.
މި ގައުމުތަކުގެ ޚާރިޖީ ވަޒީރުން އެއްބަސްވެ ވަޑައިގަތީ ގުޅުން ބިނާވެފައި އޮންނަން ވާނީ ދެފުށްފެންނަ ހުރިހައި ފަރާތެއްވެސް ބައިވެރިވާ ކޮންމެ ގައުމަކަށްވެސް އެގައުމަކަށް މުހިންމުވާ މައްސަލަތަކަށް އިސްކަން ދެވޭ ގޮތަށް، އަދި މާލީ ގޮތުން ދަރަނިވެރި ނުވާ، ދެމެހެއްޓެނިވިގޮތަކަށް ކަމަށާއި ހުރިހައި ގައުމެއްގެވެސް މިނިވަންކަމާއި އިސްތިގްލާލު ދެމެހެއްޓޭފަދަ ގޮތަކަށް ކަމަށެވެ.
ގައުމުތަކުގެ ޚާރިޖީ ވަޒިރުން އެއްބަސްވެވަޑައިގަތް މި އުސޫލުތަކަކީ ޗައިނާއިން ގެންގުޅޭ ދަރަނީގެ ދަންތުރައިގެ ޖެއްސުމުގެ ސިޔާސަތާ ދެކޮޅަށް ދީފައިވާ ސްޓޭޓްމެންޓެއްކަމަށް މީޑިއާއިން ފާހަގަ ކުރެއެވެ.
