އެމެރިކާއަށް ދުނިޔޭގެ ތިން ބިތުން ބޮޑު ތިން ގޮންޖެހުންމަކާ ކުރިމަތިލާން ޖެހިފައިވާ ކަމަށް މުހައްލިލުން ދެކެއެވެ. ޗައިނާއާ އެމެރިކާއާ ކޯޅުމެއްގައި އުޅޭއިރު ޗައިނާއިން ޓައިވާނަށް ހަމަލައެއްދީ އެ ޖަރީޒާ ހިފަން ދިމާ ކުރުމަކީ އެމިރކާގެ މަސްލަހަތަށް ބުރޫ އަރާނެ ކަމެކެވެ. އަނެއް ކޮޅުން ރަޝިޔާއާ ޔޫކްރޭންއާ ދެމެދު ޫނުވަމުންދާ މަސްރަހުގައި ރަޝިޔާ ބާރުގަދަ ވާނެ ނަމަ އެއީ އެމެރިކާގެ މަސްލަހަތަށް ނުރައްކާ ވާނެ ކަމެކެވެ. އީރާނަކީވެސް އެމެރިކާއިން އުދަގޫ ނިއުކްލިއަރ މަޝްވަރާތަކާ ކުރިމަތިލާން ޖެހިފައިވާ ގައުމެކެވެ. އަދި އޭގެ އިތުރުން ސޫރިޔާގެ މަސްރަހާއި ތުރުކީވިލާތާއެކު އޮތް ހައްސާސް ގުޅުމަކީވެސް އެމެރިކާއިން ސަމާލުވާން ކެހޭ ކަމެކެވެ.
އެމެރިކާއިން ވަނީ 16 ސިފައިން ބައިވެރިކޮށްގެން ދެވަނަ ބޮޑު ހަނގުރާމަ ކާމިޔާބު ކޮށްފައެވެ. އެޓްލާންޓިކް ކަނޑު ހުރަސްކޮށް، ނާޒީ ޖަރުމަންވިލާތާ ހަނގުރާމަ ކުރުމަށް ޔޫރަޕްގައި އެމެރިކާ ސިފައިން ހަރަކާތްތެރިވިއެވެ. އަދި ޖަޕާނުގެ ސިފައިންނާ ހަނގުރާމަ ކުރުމަށް ދެކުނު އިރުމަތީ އޭޝިއާގައި އެމެރިކާ ސިފައިން އުޅުނެވެ. އެހެންވެ، ދެވަނަ ބޮޑު ހަނގުރާމައަކީ އެމެރިކާ ސިފައިން އެއްފަހަރާ ކުރި ދެ ހަނގުރާމަ ކަމަށް ބެލެވެއެވެ.
މުހައްލިލުން ވަޒަން ކުރާ ގޮތުގައި އެމެރިކާއަށް މިހާރު އެއްފަހަރާ ދެ ހަނގުރާމަ ކުރެވޭ ވަރަށް ވުރެން އެމެރިކާ ބައްޔެވެ. ނަމަވެސް އެއް ހަނގުމާމަ ކުރުމާއެކު އެހެން ކުދިކުދި ހަނގުރާމަތައް އެމެރިކާއަށް ކުރިއަށް ގެންދެވިދާނެ ކަމަށް ބެލެވެއެވެ.
އެމެރިކާއިން ވަނީ އަފްޣާނިސްތާނާއި އިރާގްގައި އެއްފަހަރާ ހަނގުރާމަ ކޮށްފައެވެ. ދެ ގައުމުންވެސް އެމެރިކާ ސިފައިން ވަނީ ބާލާފައެވެ.
އެމެރިކާގެ ރައީސް ޖޯ ބައިޑެންގެ ސަރުކާރުން އައު ދިފާއީ ސްޓްރެޓެޖީއެއް ހާމަކޮށްފައެއް ނުވެއެވެ. ނަމަވެސް ދިފާއީ ކަންކަމުގައި އަމަލު ކުރާނެ ގޮތުގެ ސްޓްރެޓެޖިކް ޕްލޭނެއް ވަނީ ހާމަކޮށްފައެވެ. މި ޑޮކިއުމެންޓް ބުނާ ގޮތުން އެމެރިކާގެ އެންމެ ބޮޑު ވާދަވެރިއަކީ ޗައިނާއެވެ. އަދި ރަޝިޔާއިން ދަނީ ދުނިޔޭގައި ނުފޫޒު ފެތުރުމަށް މަސައްކަތް ކުރަމުންނެވެ. އެމެރިކާއިން ސިފައިން ބައިތިއްބާނީ، ޕެސިފިކް ކަނޑުގެ ސަރަހައްދާއި ދެކުނު އިރުމަތީ އޭޝިއާގައި ކަމަށް މި ޑޮކިއުމެންޓްގައި ބުނެއެވެ. އަދި މެދުއިރުމަތީގައި އެމެރިކާއިން އެސަރަހައްދުގެ ބޭނުމަށް އެކަށީގެންވާ މިންވަރަށް ސިފައިން ބައިތިއްބާނެ ކަމަށް ބުނެފައި ވެއެވެ.
ލަފާ ކުރެވޭ ގޮތުގައި ބައިޑެންގެ ސަރުކާރުން އަންނަ އަހަރު ކުރީކޮޅު އައު ދިފާއީ ސްޓްރެޓެޖީއެއް ހާމަ ކުރާނެއެވެ.
އެމެރިކާގެ ދިފާއީ ކުޅަދާނަކަން ވަޒަންކޮށް، ހެރިޓޭޖް ފައުންޑޭޝަނުން އެކުލަވާލި 600އެއްހައި ސަފްހާގެ ރިޕޯޓްގައިވެސް ބުނެފައި ވަނީ އެމެރިކާއަށް އެއްފަހަރާ ދެ ހަނގުރާމައެއް ކުރިއަށް ނުގެންދެވޭނެ ކަމަށެވެ. މި ރިޕޯޓްގައި ބުނެފައި ވަނީ އެމެރިކާއަށް ހުރި ނުރައްކާތެރިކަން ކުޑައެއް ނޫން ކަމަށެވެ. އަދި އެމރިކާއަށް އެންމެ ބޮޑަށް ނުރައްކާ ވާން އޮތީ 4+1 އި ން ކަމަށެވެ. އެއީ، ރަޝިޔާއާއި ޗައިނާއާއި އުތުރު ކޮރެއާއާއި އީރާން އިން ކުރިމަތިވާން އޮތް ނުރައްކަލަށް ކޮށްފައިވާ އިޝާރާތެކެވެ.
ހެރިޖޭޓް ފައުންޑޭޝަންގެ ރިޕޯޓްގައި ބުނާ ގޮތުން ޗައިނާއާއެކު ހަނގުރާމެއް ކުރާނަމަ، އެހަނގުރާމައެއް ވާނީ މައިގަނޑު ގޮތެއްގައި ކަނޑުގެ ސިފައިންނާއި ވައިގެ ސިފައިން ބައިވެރިވާ ހަނގުރާމައަކަށެވެ. އަދި ރަޝިޔާއާއެކު ހަނގުރާމައެއް ކުރާނަމަ އެ ހަނގުރާމައެއް ވެގެންދާނީ އެއްގަމު ސިފައިންނާއި ވައިގެ ސިފައިން ބައިވެރިކޮށްގެން ކުރަން ޖެހޭ ހަނގުރާމައެއް ކަމަށެވެ.
އެމެރިކާގެ ދިފާއީ ދާއިރާ ހީނަރުވެފައި ވަނީ ދިފާއީ ވުޒާރާގެ ބަޖެޓް އުނިކުރަމުން ދިއުމުންނެވެ.
