ސައުދީ އަރަބިއްޔާއިން ޗައިނާއާ ގުޅިގެން ބެލެސްޓިކް މިސައިލް އުފެއްދުމަށް މަސައްކަތް ކުރަމުންދާ ކަމަށް ސީއެންއެން އިން ބުނެފިއެވެ. މިއީ ސީއެންއެންއިން ސައޫދީ ޗައިނާ ބެލެސްޓިކް މިސައިލް ޕްރޮގްރާމާ ބެހޭ ގޮތުން ޚަބަރު ގެނަސްދިން ދެވަނަ ފަހަރެވެ.
ސީއެންއެންއެންއިން ބުނާ ގޮތުން އަމިއްލަ ކުންފުންޏެއް މެދުވެރިކޮށް ނަގާފައިވާ ސެޓެލައިޓް ފޮޓޯގެ ޒަރީއާއިން ކަށަވަރު ކުރެވެނީ ސައޫދީން ސަހަރާގައި ޗައިނާގެ އެހީގައި ހަދާފައިވާ މަރުކަޒެއްގައި ބެލެސްޓިކް މިސައިލް ޓެސްޓް ކުރުމުގެ މަސައްކަތް ކުރަމުން ދާ ކަމަށެވެ.
ސީއެންއެން އިން ގުޅުމުން ސައޫދީ ސަރުކާރުންވެސް އަދި ވޮޝިންޓަނުގައި ހުންނަ ސައުދީ އެމްބަސީންވެސް މިއަށް ޖަވާބެއް ދީފައެއް ނުވެއެވެ.
ޗައިނާ ފޮރިން މިނިސްޓްރީން ބުނެފައި ވަނީ ސައޫދީއާއެކު ދިފާއީ ޓެކްނޮލޮޖީގެ އެއްބަސްވުން ހަދައިގެން އެއަށް އަމަލު ކުރަމުންދާ ކަމަށާއި ނަމަވެސް ނުރައްކާތެރި ހަތިޔާރު ފެތުރުމަށް އެއްވެސް މަސައްކަތެއް ކުރަމުން ނޖުދާ ކަމަށެވެ. އަދި މި ގުޅުމުގެ ސަބަބުން ބައިނަލްއަގްވާމީ އެއްވެސް ގާނޫނަކާ ޚިލާފް ވެފައި ނުވާނެ ކަމަށެވެ.
އެމެރިކާއިން ދަނީ އީރާންގެ ބެލެސްޓިކް މިސައިލް ޕްރޮގްރާމާއި ނިއުކްލިއަރ ޕްރޮގްރާމާ ދެކޮޅަށް ގަދައަޅައި މަސައްކަތް ކުރަމުންނެވެ.
ސައުދީން ބެލެސްޓިކް މިސައިލް ޕްރޮގްރާމެއް ގެންގުޅުމުން، ބައިޑެންގެ ސަރުކާރުން އީރާނާ މެދު ގެންގުޅޭ ސިޔާސަތަށް އަލުން ނަޒަރެއް ހިންގާލަން ޖެހޭނެ ކަމަށް މުހައްލިލުން ދެކެއެވެ.
ސައޫދީން ޗައިނާއާ ގުޅިގެން ބެލެސްޓިކް މިސައިލް އުފައްދާ ކަމުގެ މައުލޫމާތު އެންމެ ފުރަތަމަ ހާމަވީ، އެމެރިކާގެ ކުރީގެ ޓްރަމްޕް ރައީސްގެ ވެރިކަމުގައެވެ. ކޮންގްރެސްއަށް މި މައުލޫމާތު ލިބުނު އިރު ހާމަވެފައި ވަނީ އެމެރިކާ ސަރުކާރަށް މިކަމުގެ ޖާސޫސީ މައުލޫމާތު ލިބިފައިވާއިރު ގަސްތުގައި މި މައުލޫމާތު ސިއްރު ކޮށްފައި އޮތީ ކަމަށެވެ.
ސައޫދީ ރަސްގެފާނުގެ އާލާސްކަންފުޅާހެދި، އެގައުމުގެ ވެރިކަމުގެ ހުރިހައި ބާރެއް ލިބިވަޑައިގެންފައިވާ، ވަލީ ޢަހުދު މުޙައްމަދު ބިންސަލްމާންއަކީ ބައިޑެންގެ ސަރުކާރުން ސީދާ މުއާމަލާތު ކުރަން ބޭނުންވާ ފަރާތެއް ނޫންކަމުގައި ބައިޑެން ވަނީ ކުރިން ވިދާޅުވެފައެވެ.
ސީއެންއެންގެ މިރިޕޯޓާ ގުޅިގެން އެމެރިކާ ސަރުކާރުން ސައޫދީއާއެކު ގެންގުޅޭނެ ސިޔާސަތެއް އަދި ސާފެއް ނުވެއެވެ.
