އީރާނަށް ހަމަލަ ދިނުމުގެ ކުޅަދާނަކަމެއް އިޒްރޭލްގެ ކިބައިގައި މިދުވަސްވަރު ނެތްކަމަށް އިޒްރޭލުގެ މަސްއޫލުވެރިއަކު ވިދާޅުވެފައިވާތީ އެކަމާ މެދު އިޒްރޭލުގައި ނުތަނަވަސްކަން އުފެދިއްޖެއެވެ. އިޒްރޭލުގެ ސަލާމަތީ މަސްއޫލުވެރިން ވިދާޅުވެފައި ވަނީ މިޑްއީސްޓް ނިއުސްއަށް މިފަދަ މައުލޫމާތެއް ދިން މަސްއޫލުވެރިއަކު ހޯދައި އެފަރާތަކާ މެދު ގައުމީ ސަލާމަތަށް ނުރައްކާ ކޮށްފައިވާ ކަމަށް ބަލައި ޝަރީއަތް ހިންގަން ވާނެ ކަމަށެވެ.
އިޒްރޭލުން ބުނާ ގޮތުން އީރާނާ ދެކޮޅަށް ހަމަލަ ދިނުމަށް އެގައުމުން ވަނީ ތައްޔާރުކޮށްފައެވެ. އަދި މިއީ އޭގެ އަސަރު މުޅި ދުނިޔެއަށް ކުރާނެ ހަމަލައެއް ކަމަށްވެސް ބުނެއެވެ.
އަނެއްކޮޅުން ބައެއް މަސްއޫލުވެރިން ވދާޅުވާ ގޮތުން އީރާނުގެ ނިއުކްލިއަރ ހަތިޔާރާ ބެހޭ މަރުކަޒުތައް ގައުމުގެ ހުރިހައި ހިސާބެއްގައި ފެތުރިފައި ވުމާއި އަދި މިތަންތާނގައި ދިފާއީ ރޮކެޓްތަކާއި ވައިގެ ދިފާއީ ފިޔަވަޅުތައް އަޅާފައި ހުރުމުން ހަމަލައެއް ދިނުމަކީ ކުރެވޭނެ ކަމެއް ނޫނެވެ.
އިޒްރޭލުގެ ކުރީގެ ބޮޑު ވަޒީރު ބެންޔަމީން ނަތަންޔާނޫގެ އަމުރަށް އިޒްރޭލަށް ހަމަލަ ދިނުމަށް ތައްޔާރު ކުރެވުނެވެ. ނަމަވެސް ފަހު ވަގުތު ސިފައިންގެ އިސްވެރިޔާ އެހޫދު ބަރާކް، މަތިންދާބޯޓްތައް ނައްޓާ ނުލުމަށް އެންގުމުން އެކަން ހުއްޓާލީއެވެ.
އިޒްރޭލުން އީރާނާ ދެކޮޅަށް ހަމަލައެއް ދީފިނަމަ، ލުބުނާންގައި ހިޒްބުﷲއިން ލިބިގެންވާ ހުރިހައި ބާރާއެކު އިޒްރޭލާ ދެކޮޅަށް ނިކުންނާނެ ކަމަށްވެސް އިޒްރޭލް މަސްއޫލުވެރިން ވިދާޅުވެއެވެ. އަދި މިފަދަ ހަމަލައެއް ފެށިއްޖެނަމަ، އެއީ އިޒްރޭލަށް ދިފާއުވާން އުދަގޫ ހަމަލަތަކެއް ކަމުގައިވާނެ ކަމަށް އެފަރާތްތަކުން ދެކެއެވެ.
އީރާނުން ވަނީ އައްރަސޫލްއައުޒަމް 17ގެ ނަމުން ބާއްވާފައިވާ ދިފާއީ އަސްކަރީ ތަމްރީންތައް ނިންމާލާފައެވެ. އީރާންގެ ސިފައިންގެ ވެރިޔާ ވިދާޅުވިގޮތުން މިއީ އެއްވެސް ގައުމަކުން އީރާނާ ދެކޮޅަށް ހަމަލައެއް ދީފާނެތީ އެކަމާ ދެކޮޅަށް ރައްދު ދިނުމުގެ ގޮތުން ތައްޔާރަށް ތިބިކަން އަންގާލަ ދިނުމަށް ބޭއްވި ތަމްރީންތަކެކެވެ.
އޭނާ ވިދާޅުވީ އަމަލީ ސިފައެއް ގެނައުމުގައި ހަމައެކަނި ބަދަލު ކޮށްލަން ޖެހޭނީ މިސައިލް ފޮނުވާލަންވާ ދިމާ އެކަންޏެވެ. މިއީ އިޒްރޭލަށް ކުރި އިޝާރާތެއްކަމަށް ބެލެވެއެވެ.
އީރާނަކީ މެދުއިރުމަތީގައި އެންމެ ގިނައިން މިސައިލް އަތުރާލާފައިވާ ގައުމެވެ.
އީރާނުން 18 ވައްތަރެއްގެ ބެލެސްޓިކް މިސައިލް ގެންގުޅެއެވެ. މިއީ 40 ކިލޯމީޓަރުން ފެށިގެން ގޮސް ތިން ހާސް ކިލޯމީޓަރާ ހަމައަށް ފޯރާވަރިގެ ބާރިގަދަ މިސައިލްތަކެކެވެ.
އީރާނަކީ ދުނިޔޭގެ 14 ވަނަ އެންމެ ބޮޑު ދިފާއީ ބާރެވެ. އިޒްރޭލަކީ 20 ވަނައަށް އެންމެ ބޮޑު ދިފާއީ ބާރެވެ. ސިފައިންގެ ޚިދުމަތަށް ނެރެވޭ ވަރުގެ 3 މިލިއަން މިހުން އިޒްރޭލްގައި ތިބި އިރު އީރާންގައި 40 މިލިއަން މީހުން އެބަތިއްބެވެ. އަދި އަސްކަރީ އުޅަނދުތަކާ އަޅާ ބަލާއިރު އީރާންގެ އުޅަނދުތަކާއި ދިފާއީ ވަސީލަތްތައް އިޒްރޭލަށްވުރެން މާބޮޑަށް އިތުރު ވެފައި ގިނަ ކަމަށް ދައްކައެވެ.
