އިޒްރޭލުން ގޯލާންގެ އުސްބިންތައް އިސްތިއުމާރުކޮށްގެން އިޒްރޭލުގެ ބާރުގެ ދަށަށް ގެންދިޔަތާ 40 އަހަރު ފުރިއްޖެއެވެ. ފެހި ވާދީތަކާއި ފެން އާރުތައް ހިމެނޭ ގޯލާންގެ އުސްބިންތަކަކީ 1967ގެ ހަނގުރާމައިގައި އިޒްރޭލުން ހިފާފައިވާ ބިންތަކެކެވެ. ގޯލާންގައި ދިރިއުޅެނީ ސޫރިޔާގެ ދުރޫޒް ދީނުގެ މީހުންނެވެ.
1967ގެ ހަނގުރާމައިގައި މިސްރުގެ ސުއޭޒް ކެނަލްއާއި ސީނާއިން އިޒްރޭލުން ހިފި ބިންތައް މިނިވަން ކުރުމަށް މިސްރުގެ ރައީސް އަންވަރު ސާދާތު މަސައްކަތް ކުރެއްވިއިރު، އެ ހަނގުރާމައިގައި ބައިވެރިވި، ސޫރިޔާގެ ރައީސް ހާފިޒުލް އަސަދު ގޯލާން މިނިވަން ކުރުމަށް މަސައްކަތް ކުރައްވާފައި ނުވާ ކަމަށް މުއައްރިޚުން ބަލައެވެ.
ގޯލާންއަކީ އިޒްރޭލަށް މީރުފެން ލިބުމުގައި މުހިންމު މަސްދަރެކެވެ.
ސޫރިޔާއާއި އިޒްރޭލުން ގޯލާނާ ބެހޭ ސިއްރު މަޝްވަރާތައްވެސް ބާއްވާފައި ވެއެވެ. މީގެ ޝަރުތަކީ އިޒްރޭލުން ގޯލާން އަނބުރައި ދޭ މަތިން ސޫރިޔާއިން އިޒްރޭލާއެކު ސުލްހައިގެ އެއްބަސްވުމެއް އެކުލަވާލައި ސުލްހަ ވުމެވެ. ބައްޝާރުލް އަސަދުގެ ސަރުކާރާއެކު މި މަޝްވަރާތައް ކުރިއަށް ގެންދިއުމަށްފަހު 2010ގައި މި ވާހަކަތައް ވަނީ ކޮޅެއްގައި ނުޖެހި ނިމިފައެވެ. މި ވާހަކަތައް ނާކާމިޔާބުވީ ސޫރިޔާއިން އީރާނާ ގުޅުން ކަނޑާލުމަށް އިޒްރޭލުން ޝަރުތު ކުރުމުންނެވެ.
