އަފްޣާނިސްތާންގެ ރަސްގެފާނުގެ އަންހެން ދަރިފުޅު މިއަދު ކާބުލްގެ ހަސްފަތާލުގައި އަވަހާރަވެއްޖެއެވެ. މުޙައްމަދު ޟާހިރު ޝާހް ރަސްގެފާނުގެ ދަރިފުޅު، ބީބީ މަރްޔަމް ނަޢީމް (ފޮޓޯގެ ވާތްފަރާތުގައި) އަވަހާވިކަން އިޢުލާން ކުރެއްވީ އެކަމަނާގެ ދަރިފުޅު، ސަރުދާރު މުޙައްމަދު ނާދިރު ނަޢީމް އޭނާގެ ފޭސްބުކްގައި ކުރެއްވި ޕޯސްޓެއްގައެވެ.
އެކަމަނާގެ ޖަނާޒާ ބޭއްވުމަށް ހަމަޖެހިފައި އޮތީ މިއަދު ކާބުލްގައެވެ.
މުޙައްމަދު ޟާހިރު ޝާހް ރަސްގެފާނަކީ އަފްޣާނިސްތާންގެ އެންމެ ފަހު ރަސްގެފާނެވެ. ޒަމާނީ އަފްޣާނިސްތާން ބިނާ ކުރެއްވުމަށް އޭނާގެ 40 އަހަރުގެ ރަސްކަމުގައި ގިނަ މަސައްކަތްތަކެއް ކުރެއްވިއެވެ.
ރޫސީންގެ ނުފޫޒުން އޭނާގެ ރަސްކަން ވައްޓާލުމާ ގުޅިގެން ގިނަ ދުވަސްތަކެއް ވަންދެން ސިޔާސީ ޙިމާޔަތުގައި ރޯމް ގައި ދިރިއުޅުއްވިއެވެ. އެމެރިކާ ސިފައިން އަފްޣާނިސްތާން ހިފައި، ތާލިބާނުން ވެރިކަމުން ފައްސާލުމާ ގުޅިގެން ޟާހިރު ޝާހް ރަސްގެފާނު 2002ގައި ކާބުލްއަށް އެނބުރި ވަޑައިގަތެވެ.
ރަސްގެފާނު އެނބުރި ކާބުލްއަށް ވަޑައިގަތުމުން ތަކުރީމް ކުރެއްވުމުގެ ގޮތުން އެއިރުގެ އަފްޣާނިސްތާންގެ ރައީސް ހަމިދު ކަރްޒާއީ ސިފަ ކުރެއްވީ ޟާހިރު ޝާހް އަކީ އަފްޣާނިސްތާންގެ ބައްޕަ ކަމުގައެވެ.
ރަސްގެފާނު އަވަހާރަވީ 2007ގައި ކާބުލްގައެވެ. އަދި ފަސްދާނުވަޑުވާފައި ވަނީވެސް ކާބުލްގައެވެ.
ތާލިބާނުން ވެރިކަން ހިފި ފަހުން ބުނެފައި ވަނީ ތާލިބާނުން ވެރިކަން ކުރާއިރު ބަލައިގަންނާނެ ގާނޫނުއަސާސީއަކީ ޟާހިރު ޝާހްގެ ގާނޫނުއަސާސީ ކަމަށެވެ.
