ދުނިޔޭގެ އީޖާދީ ގައުމުތަކުގެ ގިންތީގައި ޕާކިސްތާން ވަނީ ވަރަށް ފުލަށް ވެއްޓިފައެވެ. 132 ގައުމެއްގެ މައްޗަށް ދިރާސާކޮށް ނެރެފައިވާ 2021ގެ ގްލޯބަލް އިނޮވޭޝަން އިންޑަކްސްގައި ޕާކިސްތާން ގިންތިކޮށްފައި ވަނީ 99 ވަނާގައެވެ.
ޕާކިސްތާންގެ އެކްސްޕްރެސް ޓްރިބިއުން ނޫހުން ބުނާ ގޮތުން ޕާކިސްތާން އީޖާދީ ގައުމުތަކގެ ގިންތީގައި މިހާ ފުލަށް ވެއްޓިގެން ގޮސްފައި ވަނީ ތައުލީމާއި ލިޔަންކިޔަން ދަތުމަށް ޕާކިސްތާނުން ހޭދަކުރާ މިންވަރު މަދުވެގެންނެވެ.
ޕާކިސްތާނަކީ ދެކުނު އޭޝިއާގައި ލިޔަންކިޔަން ދަތުމުގައި އެންމެ ފުލުގައި އުޅޭ ގައުމެވެ. ޕާކިސްތާނުން ތަޢުލީމަށް ހޭދަ ކުރަނީ ޖީޑީޕީގެ 2.9 އިންސައްތައެވެ.
ޕާކިސްތާންގެ އަންހެނުންގެ މެދުގައި ލިޔަންކިޔަން ދަތުން އުޅެނީ ފަންސާސް ޕަސެންޓާ ކައިރީގައެވެ. އަދި ގައުމީ ފެންވަރުގައި ޖުމުލަކޮށް ލިޔަންކިޔަން ދަތުމުގެ ނިސްބަތް އުޅެނީ ބާހައްޓި އިންސައްތައިގައެވެ.
