އާސެނަލްގެ ކޯޗް މައިކަލް އާޓެޓާ ކޮވިޑަށް ޕޮޒިޓިވުމާއި ގުޅިގެން އަންނަ ހޮނިހިރު ދުވަހުގެ ރޭ މެންޗެސްޓަރ ސިޓީއާ ދެކޮޅަށް އާސެނަލް ކުޅެން ހަމަޖެހިފައިވާ މެޗް އޭނާއަށް ގެއްލިއްޖެއެވެ.
އާޓެޓާ ކޮވިޑަށް ޕޮޒިޓިވްވިކަން އާސެނަލްއިން ހާމަކުރީ މިއަދުވެއެވެ. މިދިޔަ އަހަރުގެ މާރިޗް މަހުގައިވެސް ކޮވިޑަށް އާޓެޓާ ޕޮޒިޓިވްވިއެވެ. މިފަހަރު އާޓެޓާ ކޮވިޑަށް ޕޮޒިޓިވްވިއިރު އާސެނަލް އޮތީ މިހާތަނަށް ކުޅުނު 19 މެޗުން 35 ޕޮއިންޓް ހޯދައި ތާވަލުގެ ހަތަރު ވަނައިގައެވެ. އަނެއްކޮޅުން މެންޗެސްޓަރ ސިޓީ އޮތީ 47 ޕޮއިންޓާއެކު ތާވަލުގެ އެއްވަނައިގައި ވަރަށް ރަނގަޅު ފޯމެއްގައެވެ.
މެންޗެސްޓަރ ސިޓީއާ ދެކޮޅަށް ކުޅޭ މެޗުގައި އާޓެޓާގެ ބަދަލުގައި ޓީމަށް އިރުޝާދު ދޭނީ އެސިސްޓެންޓް ކޯޗް އަލްބާޓް ސްޓޫވެންބާގެވެ. އާސެނަލްއިން ވަނީ ލީގުގައި އެންމެފަހުން ކުޅުނު މެޗުގައި ނޯވިޗް އަތުން 5-0 އިން މޮޅުވެފައެވެ.
މެންޗެސްޓަރ ސިޓީ މެޗަށްފަހު އާސެނަލްއަށް ދެން އޮންނާނީ ޖެނުއަރީ 7 ވަނަ ދުވަހު ލީގް ކަޕް ސެމީފައިނަލުގައި ލިވަޕޫލްއާ ދެކޮޅަށް ކުޅެން ޖެހޭ މެޗެވެ.
