ކުރިއަށް އޮތް ޖެނުއަރީ މަހު ފެށޭ ފިނި މޫސުމުގެ ޓްރާންސްފާ މާކެޓުގައި ރެއާލް މެޑްރިޑަށް ބަދަލު ނުވާނެ ކަމަށް އެކްލަބުން ފާރަލުން އަންނަ ޕީއެސްޖީގެ ތަރި ކިލިއަން އެމްބައްޕޭ ބުނެފިއެވެ.
އެމްބައްޕޭ ބުނީ ސީޒަން އޮތީ ކުރިއަށް ކަމަށާއި އޭނާގެ އަމާޒަކީ ޕީއެސްޖީއާއެކު ޗެމްޕިއަންސް ލީގާއި ފްރާންސް ލީގް ކާމިޔާބު ކުރުން ކަމަށެވެ. "ޖެނުއަރީ ޓްރާންސްފާ ރެއާލްއަށް ބަދަލުވުމުގެ އެއްވެސް ވިސްނުމެއް އަހަރެންގެ ނެތް. ސީޒަން އޮތީ ކުރިއަށް. ކުރިއަށް ހުރީ މުހިއްމު މެޗުތަކެއް. އަހަރެންގެ އަމާޒަކީ ޕީއެސްޖީއާއެކު ޗެމްޕިއަންސް ލީގާއި ފްރާންސް ލީގް ކާމިޔާބު ކުރުން" ސީއެންއެންއަށް ދިން އިންޓަވިއުއެއްގައި އެމްބައްޕޭ ބުންޏެވެ.
ރެއާލް މެޑްރިޑާމެދު ވިސްނަންތޯ އެހުމުން އެމްޕައްޕޭ ބުނީ ރެއާލްއާމެދު ވިސްނަމުން ދަނީ ޗެމްޕިއަންސް ލީގް ދެވަނަ ބުރުގައި ދެލެގުގައިވެސް ރެއާލް ބަލި ކުރުމަށް ކަމަށެވެ.
މީގެ އިތުރުން އެމްބައްޕޭ ވަނީ މެސީ، ޕީއެސްޖީއަށް އައުމުން ބޮޑު އުފާވެރިކަމެއް ލިބިފައިވާ ކަމަށް ބުނެފައެވެ. "މެސީއާ އެއްޓީމަކަށް އަހެރެން ކުޅެމުންދާކަން، އަހަރެންގެ ދަރިންނާއި ރައްޓެހިން ކައިރީގައި ބުނަން ފުރުސަތު ލިބިފައި އޮތުމަކީ ވަރަށް ބޮޑަށް ފަހްރުވެރިވާ ކަމެއް" އެމްބައްޕޭ ބުންޏެވެ.
