އިރާގްގެ ރައީސް ސައްދާމު ޙުސައިންއާއި އެކުގައި ތުހުމަތު ކުރެވުނު މީހުންގެ ޝަރީއަތް ހިންގުމުގައި ގާނޫނާ ޚިލާފް ގިނަ ކަންކަން ހިންގާފައިވާ ކަމަށް އެމެރިކާއިން އެދުވަސްވަރު އިރާގަށް އައްޔަން ކޮށްފައިވާ ސަފީރު ވިދާޅުވެއެވެ.
ސައްދާމު ޙުސައިން ދަންޖެއްސިތާ ފަނަރަ އަހަރު ފުރެން ކައިރި ވާއިރު ސަފީރު ރޮބަރޓް ފޯޑް ވިދާޅުވަނީ ޝަރީއަތް ގެން ގޮސްފައި ވަނީ އިޖުރާއާ ޚިލާފަށް ކަމަށެވެ.
އޭނާ ވިދާޅުވިގޮތުގައި ދިފާއީ ވަކީލުންގެ ތެރޭން ބައެއް މީހުން ޝަރީއަތުގެ މެދުތެރޭގައި އަވަހާރަކޮށްލެވުނެވެ. އަދި ސައްދާމްއާ ދެކޮޅަށް ހުށަހެޅި ބައެއް ހެކިތަކަކީ ދިފާއީ ވަކީލުންނާއި ސައްދާމަށްވެސް ކުރިން އޭގެ މައުލޫމާތު ލިބިވަޑައިގެންފައި ނުވާ އަދި ދިފާއުވުމަށް ފުރުސަތު ދީފައި ނުވާ ކަންކަން ކަމަށް އޭނާ ފާހަގަ ކުރެއްވިއެވެ.
ފޯރޑް ވިދާޅުވިގޮތުގައި ސައްދާމަށް ތހުމަތު ކުރެވުނު ބައެއް މައްސަލަތަކުގައި އޭނާ ބައިވެރިވެ ވަޑައިގަންނަވާކަމުގެ ހެކި ޚުދު ސައްދާމްއާ ބައިވެރިންގެ ފަރާތްޕުޅުން ކޯޓަށް ލިބުނެވެ. އެހެންވެ، އެއިން ބައެއް މައްސަލަތަކުގައި ސީދާ ސައްދާމްއާ އެބޭފުޅުން ބައިވެރިވެވަޑައިގަންނަވާކަން ޔަގީނެވެ. އެހެންނަމަވެސް ޝަރީއަތް ގެންދެވިފައި ވަނީ އެންމެ އެދެވޭ ގޮތަކަށެއް ނޫން ކަމަށް އޭނާ ފާހަގަ ކުރައްވައެވެ.
ސައްދާމް ޙުސައިން ދަންޖައްސާފައި ވަނީ އީދު ދުވަހުގެ ފަތިހުއެވެ. އެއީ މީލާދީ އަހަރު 2006ގެ ޑިސެމްބަރު 30ވީ ދުވަހެވެ.
