އިރާގަށް އަރައި ތިބި ހަނގުރާމައިގެ ބައިނަލްއަގްވާމީ ފައުޖުތައް އިރާގުން ފައިބައި ނިމިއްޖެކަމަށް އިރާގްގެ ބޮޑު ވަޒީރު މުސްތަފާ އަލްކާޒިމީ އިއުލާން ކުރައްވައިފިއެވެ. އަލްކާޒިމީގެ ޓުއިޓާ އެކައުންޓުން އޭނާ ވަނީ މިކަން ކަށަވަރުކޮށްދެއްވާފައެވެ.
ބޭރު ސިފައިން ދެން އިރާގުއި ދޭނީ ސަރުކާރަށް ބޭނުންވާ ސްޓްރެޓެޖިކް މަޝްވަރާތައް ކަމަށްވެސް ކާޒިމީ ވިދާޅުވިއެވެ. އޭނާ ވަނީ ބައިނަލްއަގްވާމީ ސިފައިންނާއި އިރާގުގެ އަވަށްޓެރިންނަށް ޝުކުރު އަދާ ކުރައްވަމުން ޓެރަރިސްޓް ސުންނީ ދާއިޝްއާ ދެކޮޅަށް މި ހުރިހައި ފަރާތްތަކުން ދީފައިވާ އެހީ ފާހަގަ ކުރައްވާފައެވެ.
އިރާގްގައި ބައިނަލްއަގްވާމީ ސިފައިންގެ ހަނގުރާމަ ނިމުމަކަށް އައިސްފި ކަމަށް އިރާގު ސަރުކާރުން އިޢުލާން ކުރީ މިއަހަރުގެ ޑިސެމްބަރު 9 ގައެވެ.
