ޗައިނާ ކޮމިއުނިސްޓް ޕާޓީގެ ތެރޭގައި ވާދަވެރި ދެ ފެކްޝަނެއް އުޅޭ ހެއްޔެވެ؟ ރައީސް ޝީ ޖިންޕިންގއަށް ވައި އަޅުވާ ފެކްޝަނަކާއި އޭނާގެ ކާމިޔާބީތައް ފަނޑުކޮށްލައި އޭނާގެ ކުރީގެ ލީޑަރުންނަށް ތައުރީފް ކުރާ ފެކްޝަނެއް އުޅޭ ތަން ފެނިފައި ވެއެވެ.
މި ދެފެކްޝަންގެ ވާހަކަ، ނިއްކީ އޭޝިއާގެ ތަހުލީލެއްގައި ތަފްސީލުކޮށް ގެނަސްދީފައި ވެއެވެ.
ޗައިނާ ކޮމިއުނިސްޓް ޕާޓީގެ ދުވަހު ނޫސް ޕީލަސް ޑެއިލީގައި ކޮމިއުނިސްޓް ޕާޓީގެ 19ވަނަ ސެންޓްރަލް ކޮމިޓީގެ ހަ ވަނަ ޕްލެނަރީ ސެޝަންއާ ބެހޭ ގޮތުން ދިގު ރިޕޯޓެއް ޝާއިއުކޮށްފައި އޮތެވެ. މި ޕްލެނަރީ ސެޝަންގައި ޝީޖިންޕިންގ ޗައިނާގެ ތަރައްގީއަށް ކުރައްވާފައިވާ މަސައްކަތަށް ތައުރީފް ކޮށްފައި ވެއެވެ. ނަމަވެސް ކޮމިއުނިސްޓް ޕާޓީގެ ތާރީޚް ލިޔާ ކޮމިޓީގެ ރައީސް ލިޔުއްވި މަޒްމޫނުގައި ރައީސް ޝީ އާ ބެހޭ ގޮތުން އެއްވެސް ވާހަކައެއް ލިޔުއްވާފައެއް ނުވެއެވެ. ކުރީގެ ލީޑަރުންނާ ބެހޭ ގޮތުން އެތައް ފަހަރަކު ވާހަކަ ދައްކަވައި އެފަރާތްތަކުގެ މަސައްކަތަށް އޭނާ ތައުރީފް ކުރެއްވިއެވެ.
މި ރިޕޯޓް ލިޔުއްވި ފަރާތަކީ ކޮމިއުނިސްޓް ޕާޓީގެ އެންމެ މުހިންމު ގަރާރުތައް ފާސްކުރާ ސެންޓްރަލް ކޮމިޓީގެ މެމްބަރެކެވެ.
މި މަޒްމޫނަށް ހަތަރު ދުވަސްފަހުން ކޮމިއުނިސްޓް ޕާޓީގެ ދުވަހު ނޫހުގެ ހަމަ އެސަފްހާގައި ޕާޓީގެ ސިޔާސީ ގަރާރުތަކާ ބެހޭ ކޮމިޓީގެ ރައީސް މަޒްމޫނެއް ލިޔުއްވިއެވެ. ކިރީ މަޒްމޫނާ ޚިލާފަށް މީގައި މުޅިންވެސް އޮތީ ރައީސް ޝީއަށް ޚުޝާމަދު ކޮށްފައެވެ. އަދި ކުރީގެ ލީޑަރުން ކަމަށްވާ ޑެންޝިއާއޮ ޕިންގ އާއި ހޫޖިންޓާއޯއާއި ޖިއާންގ ޒެމިންގ މިނިވަން ސިޔާސަތުތަކެއް ގެންގުޅުއްވާފައި ވާތީ އެބޭފުޅުންނަށް ފާޑު ކިޔާފައި ވެއެވެ.
މުހައްލިލުން ދެކޭ ގޮތުގައި ޗައިނާގެ ކޮމިއުނިސްޓް ޕާޓީގެ އެތެރޭގައި މިނިވަން ޚިޔާލަށް ވަކާލާތު ކުރާ ބަޔަކާއި ހަރުކަށި އުސޫލުތަކެއް ގެންގުޅެން ބޭނުންވާ ބަޔަކު އުޅޭކަން މިއިން ސާފުވެއެވެ.
