ކަލޭމެނަށް ދެން ދިރިތިޔަ ނުދޭނަން! މިއީ އިޒްރޭލުގެ ލީޑަރުންނަށް ފަލަސްތީންގެ ރައީސް މަޙުމޫދު ޢައްބާސް ދެއްވި އިންޒާރެވެ. ޢައްބާސް ވިދާޅުވީ މިހާރު ކެތްތެރިކަން ކޮޅުން ލައިގެން ހިނގައްޖެ ކަމަށެވެ.
ޕަލަސްޓައިލް ލިބަރޭޝަން އޮގަނައިޒޭޝަންގެ ފަތަޙަ ޖަމާއަތް އުފެދުނުތާ 57 އަހަރު ފާހަގަ ކުރި މުނާސަބާގައި އިއްޔެ ދެއްވި ޚިތާބެއްގައި މަޙުމޫދު ޢައްބާސް ވަނީ ހުރިހައި ފަރާތއެއް ބައިވެރިވާ ބައިނަލްއަގްވާމީ ސުލްހައިގެ ކޮންފަރެންސަކަށް ގޮވާލައްވާފައެވެ. ޢައްބާސްގެ ޚިޔާބުގައި ވިދާޅުވީ ފަލސްތީނުގެ ބިންތައް ހިފައިގެން އެތަންތާގައި ޔަހޫދީން ވަޒަންވެރިކޮށްގެން ދެނެއް ކަލޭމެނަށް ނުތިބެވޭނެ ކަމަށެވެ.
އިޒްރޭލުގެ ލީޑަރުންނާއި ސިފައިންގެ ޖެނެރަލުންނަށް އިންޒާރު ދެއްވަމުން ޢައްބާސް ވިދާޅުވީ ކޮންމެ އަގަކާއި ލައިގެން ވިއަސް ހިފާފައިވާ ބިންތަކުން ފަލަސްތީނުން އިޒްރޭލު މީހުން ބޭރު ކުރާނެ ކަމަށެވެ.
"އަށްޑިހަ އަހަރު ވަންދެން މިހެން އުޅެއުޅެ އަހަރަމެންގެ ކެތްތެރިކަން ވަނީ ގެއްލިފައި" ޢައްބާސް ވިދާޅުވިއެވެ.
އިތުރަށް ޢައްބާސް ވިދާޅުވީ، ޤުދުސްގެ ޝަޚުސިއްޔަތު ބަދަލު ކުރުމަށް ރާވައިގެން ކުރަމުންދާ މަސައްކަތާއި މަސްޖިދުލްއަޤްސާއާއި ޤުދުސްގެ ކަނީސަތުލް ގިޔާމާ ފައްޅިއާއި ޙަރަމުލްއިބްރާހީމީއަށް އަރައިގަނެ އެތަންތަން ހިފުމަށް ކުރަމުންދާ މަސައްކަތާވެސް ފަލަސްތީނުން ކުރިމަތިލާނެ ކަމަށެވެ.
ފަލަސްތީނުގެ ވެރިރަށަކީ ޤުދުސްކަމުގައި ހަދާނެ، ބައިނަލްއަގްވާމީ އެއްބަވުންތަކާ އެއްގޮތަށް ބާއްވާ ސުލްހައިގެ ކޮންފަރެންސަކަށްވެސް އޭނާ ގޮވާލެއްވިއެވެ.
