ފްރާންސްގެ ޕެރިސް ސެއިންޓް ޖާމައިން (ޕީއެސްޖީ) އަށް ކުޅެމުން އަންނަ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އާޖެންޓީނާގެ ލިއޮނަލް މެސީ ކޮވިޑް-19 މިއަދު ފައްސިވެއްޖެއެވެ.
މެސީ ކޮވިޑަށް ފައްސިވެފައިވާކަން ޕީއެސްޖީއިން ހާމަ ކުރީ މީގެ ގަޑިއެއްހައިއިރު ކުރިންނެވެ. ކޮވިޑާއި ގުޅިގެން މެސީގެ ހާލަތު ގޯސްކަން ނުވަތަ ނޫންކަން ޕީއެސްޖީއެއް ހާމަ ކޮށްފައެއް ނުވެއެވެ. މެސީގެ އިތުރުން އިތުރު ތިން ކުޅުންތެރިޔަކުވެސް ކޮވިޑަށް ފައްސިވެފައިވާކަމަށް ޕީއެސްޖީއިން ބުނެއެވެ.
"ކޮވިޑަށް ފައްސިވެފައިވާ ހަތަރު ކުޅުންތެރިންނަކީ ލިއޮނަލް މެސީ، ހުވާން ބަނާޓް، ސާޖިއޯ ރިކޯ އަދި ނަތަން ބިޓުމަޒާލާ. ހަތަރު ކުޅުންތެރިންވެސް މިހާރު ތިބީ ކޮވިޑް ޕްރޮޓޮކޯލްގެ ދަށުން އައިސޮލޭޝަންގައި" ޕީއެސްޖީއިން ނެރެފައިވާ ބަޔާނުގައި ބުނެފައިވެއެވެ.
މެސީ އާއި ޕީއެސްޖީގެ އިތުރު ތިން ކުޅުންތެރިޔަކު ކޮވިޑަށް ފައްސިވެފައިވައި މިވަނީ ޔޫރަޕުގެ ގިނަ ގައުމުތަކެއްގައި ކޮވިޑް ބާރަށް ފެތުރެމުންދާ ދަނޑިވަޅެއްގައެވެ. މިގޮތުން މެސީގެ ކުރީގެ ކްލަބު ބާސެލޯނާގެ 10 ކުޅުންތެރިން މިހާރުވެސް ތިބީ ކޮވިޑް ޖެހުމާއި ގުޅިގެން އައިސޮލޭޝަންގައެވެ.
