ސޫދާންގެ ބޮޑު ވަޒީރު އަބްދުﷲ ހަމްދޫކު އިސްތިއުފާ ދެއްވުމާ ގުޅިގެން ސޫދާންގައި މަދަނީ ސަރުކާރެއް ގާއިމް ކުރުމަށް އެމެރިކާއން ގޮވާލައިފިއެވެ. ޑިކްޓޭޓަރ އަލްބަޝީރުގެ ސަރުކާރު މަގުމަތިން ވައްޓާލިފަހުން ސޫދާން އުޅެނީ މަދަނީ ސަރުކާރެއް އެކުލަވާ ނުލެވި ހަލަބޮލި ކަމެއްގައެވެ.
ބައިނަލްއަގްވާމީ މުޖުތަމައުގައި އިޙުތިރާމް ލިބިވަޑައިގެން ހުންނެވި، ހަމްދޫކް އަކީ އިގްތިސާދީ ދާއިރާގެ މާހިރެކެވެ. އަދި އޭނާއަކީ އދގައި މަސައްކަތް ކުރައްވާފައިވާ ކުރީގެ މަސްއޫލުވެރިއެކެވެ. އޭނާ ވެރިކަން ކުރެއްވީ 2019ގައި އަލްބަޝީރުގެ ސަރުކާރު ވައްޓާލުމާއެކު ސިފައިންނާއި މަދަނީންގެ ގުޅިފައިވާ ސަރުކާރެއްގައެވެ. އޮކްޓޯބަރު މަހުވެސް ސިފައިން އޭނާއާ ދެކޮޅަށް އިންގިލާބެއް ގެނައެވެ. ނަމަވެސް ބައިނަލްއަގްވާމީ ފިއްތުން ތަކާހެދި އަލުން އޭނާ މަގާމަށް ގެންނަން މަޖުބޫރުވީއެވެ.
ހަމްދޫކް އިސްތިއުފާ ދެއްވީ ވަގުތީ މަރުޙަލާގައި ކުރިއަށް ދެވޭނެ މަގެއް ނެތްކަމަށް ވިދާޅުވަމުންނެވެ.
