ތަބްލީޣް ޖަމާއަތަކީ މުޖުތަމައަށް ހުރި ނުރައްކަލެކެވެ! އެއީ ޓެރަރިޒަމަށް ހުޅުވޭ ދޮރެކެވެ! މިއީ ތަބްލީޣް ޖަމާއަތުގެ ހަރަކާތްތައް މަނާކުރުމަށް ސައޫދީ އަރަބިއްޔާއިން ނެރުނު ބަޔާނުގައި ސިފަކޮށްފައި އޮތް ގޮތެވެ.
އިންޑިއާގައި އިސްލާމް ދީނަށް މީހުން ހޭލުންތެރިކުރުމަށް 1926 ގައި ފެށި ޙަރަކާތް ވަނީ ފުޅާވެގެން ގޮސް ދުނިޔޭގެ ކަންކޮޅުތަކުގައި އެތައް ޖަމާއަތަކުން އަމިއްލައަށް ހިންގާ ހަރަކާތަކަށް ވެފައެވެ.
ސައުދީ ސަރުކާރުން އިއުލާން ކޮށްފައި ވަނީ ތަބްލީޣީ ޖަމާއަތުގައި ބައިވެރިވުމަކީ ރައްޔިތުންނަށް މަނާ ކަމެއް ކަމަށެވެ.
ހުކުރު ޚުތުބާގައިވެސް ތަބްލީޣީ ޖަމާއަތުގެ ނުރައްކަލަށް މީހުން ހޭލުންތެރި ކުރުމަށްވެސް ސައޫދީ އިމާމުންނަށް އިރުޝާދު ދީފައި ވެއެވެ.
އިސްލާމިކް މިޝަނަރީ ބައެއްގެ ގޮތުގައި ތަބްލީޣީ ޖަމާއަތް އިންޑިއާގައި ފެށީ ލިޔަންކިޔަން ނުދަންނަ މީހުންނަށް ނަމާދުގައި ކިޔާތަކެތި އުގަންނައި ދިނުމަށާއި ނަމާދަށް ނާރާމީހުން މިސްކިތަށް ގެނައުމުގެ ހަރަކާތެއްގެ ގޮތުގައެވެ. އިންޑިއާގެ އެންމެ ބޮޑު ދީނީ ޢިލްމީ މަރުކަޒު ދާރުލްއުލޫމު ދެއޮބަންދުން ވަނީ ސައޫދީ ނިންމުން ކުށްވެރިކޮށްފައެވެ.
ބެލެވޭ ގޮތުގައި ސައޫދީގެ މޭކެރުމަށް ދިމާވާ މައްސަލައަކީ ތަބްލީޣް ޖަމާއަތުގައި ހަރަކާތްތެރިވާ ފަރާތްތަކުން ވައްހާބީ ވާހަކަތަކާއި އަގީދާ ކުށްވެރިކޮށް ވާހަކަ ދެއްކުމެވެ. ތަބްލީޣީ އަޖާމއަތް ސައޫދީން ވަނީ ރަސްމީ ސިފައެއްގައި މީގެ ތިރީހަކަށް އަހަރުކުރިންވެސް މަނާ ކޮށްފައެވެ. ނަމަވެސް މިފަހަރުގެ ނިންމުމުން މި ޖަމާއަތްތަކަށް ފައިސާ ލިބުން ދަތިވާނެ ކަމަށް ބެލެވެއެވެ.
