ޗައިނާގެ މުސްލިމު ގަތުލުއާންމަށް ހިލްޓަން ކުންފުނިން ހިތްވަރުދޭތީ، ހިލްޓަން ހޮޓެލްގައި ރޭނުކުރުމަށާއި ހިލްޓަން ހޮޓަލާއެކު ވިޔަފާރި ނުކުރުމަށް މުސްލިމުންނަށް ގޮވާލައިފިއެވެ. އެމެރިކާގެ މުސްލިމުންގެ ހައްގަށް މަސައްކތް ކުރާ ކެއަރ ޖަމުއިއްޔާއިން މިފަދައިން ގޮވާލީ ޗައިނާގެ ކޮމިއުނިސްޓް ސަރުކާރުން ޝިންޖިއާންގައި މިސްކިތެއް ތަޅާލުމަށްފަހު އެ ބިމުގައި ހޮޓަލެއް އެޅުމަށް ހިލްޓަން އާ ބިން ހަވާލު ކުރުމާ ގުޅިގެންނެވެ. ކެއަރއާއެކު ހިލްޓަން ބޯއިކޮޓް ކުރުމަށް ގޮވާލާ ގޮވާލުމުގައި އެމެރިކާގެ 40 ޖަމާއަތަކުން ބައިވެރި ވެއެވެ. ކޮންގްރެސްގައި ހިމެނޭ ދެޕާޓީގެ މެމްބަރުންގެ ޖަމާއަތަކުންވެސް ހިލްޓަންއަށް މި ކަމުގައި ކުރިއަށް ނުދިއުމަށް ނަސޭހަތްތެރި ވެފައި ވެއެވެ.
ކެއާރ އިން ނެރެފައިވާ މީޑިއާ އެޑްވައިޒަރީއެއްގައި ބުނެފައި ވަނީ މުސްލިމުންގެ ގަތުލުއާންމެއް ހިންގާކަމަށް ތުހުމަތުކުރެވޭ ޗައިނާގެ ޝިންޖިއާންގައި ހިލްޓަންއިން ވިޔަފާރި ނުކުރުމަށާއި އަދި މިސްކިތް ތަޅާލި ބިމުގައި ހޮޓަލެއް ބިނާ ނުކުރުމަށެވެ. ކެއަރ އިން ހިލްޓާ ބައްދަލުކޮށް މި ކަމަށް ހައްސާސް ވުމަށް ވާހަކަ ދެއްކުމުންވެސް ހިލްޓަން އިން ވަނީ މިކަމުގައި ކުރިއަށް ދިއުމަށް ނިންމާފައެވެ.
ކެއަރއިން މިކަމުގައި ހިލްޓަންއާ ވާހަކަ ދައްކަން ފަށާފައި ވަނީ މިދިޔަ އަހަރުގެ މެދުތެރޭން ފެށިގެންނެވެ.
އޮސްޓްރޭލިއާގެ ސްޓްރެޓިޖިކް ޕޮލިސީ އިންސްޓިއުޓުން ބުނާ ގޮތުގައި މުސްލިމު ޝިންޖިއާންގެ 16 ހާސް މިސްކިތްތަކުގެ ތެރޭން 900 މިސްކިތެއް ވަނީ އެއްކޮށް ތަޅާލާފައެވެ. ނުވަތަ މިސްކިތުން ބައެއް ތަޅާލާފައެވެ.
ޗައިނާގެ ޝިންޖިއާންގެ ކޮމިއުނިސްޓް ޕާޓީން މިކަން ކޮށްފައިވަނީ 2017އާއި 2021އާ ދޭތެރޭގައެވެ.
ޗައިނާގެ މިސްކިތްތަކުން ގުއްބުތަކާއި މުންނާރުތައްވެސް ވަނީ ތަޅާލާފައެވެ. އަދި ޝީ ޖިންޕިން ބުނާ ޗައިނާ ވަންތަ ސިފައިގައި މިސްކިތްތައް ދެއްކުމަށްޓަކައި ކޮމިއުނިސްޓް ޝިއާރުތައް ވެސް މިސްކިތުގައި ހިއްޕާފައި ވެއެވެ.
