އަފްޣާނިސްތާނާއި ޕާކިސްތާންގެ ސަރަހައްދު މަތީގައި ޕާކިސްތާނުން އިތުރަށް ނަރުދަލުން ފުޅަފި ޖެހުމަށް ފުރުސަތެއް ނެތް ކަމަށް އަފްޣާނިސްތާނުން ބުނެފިއެވެ.
ތާލިބާންގެ ކޮމާންޑަރު މައުލަވީ ސަނާއުﷲ ސަންގީ ބުނެފައި ވަނީ މިވޭތިވެ ދިޔަ ތަނުގައި ޕާކިސްތާނުން ޖަހާފައިވާ ފުޅަފިތަކަށް އިތުރަށް އެންމެ ފުޅައްފެއްވެސް ޖެހުމަށް އަފްޣާނިސްތާނުން ދެނެއް ފުރުސަތެއް ނުދޭނެ ކަމަށެވެ.
ޕާކިސްތާނާއި އަފްޣާނިސްތާނާ ދެމެދުގެ ސަރަހައްދު މަޝްހޫރުވެފައިވަނީ ޑޫރޭންޑް ލައިންގެ ނަމުންނެވެ. މިއީ ހިންދުކޫޝް ފަރުބަދަ ނިމޭ ހިސާބުން ކުރީގެ އިންޑިއާ އަށްވީ ސަރަހައްދާއި އަފްޣާނަށްވީ ސަރަހައްދުގައި ގަބީލާ މީހުންގެ ބިންތައް ބެހުމަށްފަހު ފާހަގަ ޖަހާފައިވާ ރޮނގަށް ކިޔާފައިވާ ނަމެވެ.
1893ގައި މި ރޮނގު މާކު ކުރުމަށްފަހު ސަރ ޑުރޭންޑް ވަނީ އަފްޣާނިސްތާންގެ އެއިރުގެ އަމީރު އަބްދުއްރަޙްމާން ޚާނާއާއެކު ފާހަގަކޮށްފައިވާ ސަރަހައްދަށް އެއްބަސްވެ ސޮއިކުރުވާފައެވެ.
ޕާކިސްތާން އުފެދުނު ފަހުން ދޭތެރޭން އަފްޣާނިސްތާނާއި ޕާކިސްތާނާ ދެމެދު ސަރަހައްދުގެ މައްސަލާގައި ދެބަސްވުންތައް އުފެދެއެވެ.
ޕާކިސްތާންގެ ޚާރިޖީ ވަޒީރު މަޙުމޫދު ޤުރެއިޝީ ވިދާޅުވަނީ، އަފްޣާނިސްތާނާއެކު ސަރަހައްދުގެ މައްސަލަ ބަހުސްކުރާނީ ޑިޕްލޮމެޓިކް ޗެނަލްތައް މެދުވެރިކޮށް ކަމަށެވެ.
