ރޫސީވިލާތުގެ އެންމެ ފަހު ރައީސް މީޚާއީލް ގޮރްބަޗޯފް ހުޅަނގާއި އެމެރިކާއަށް ފާޑު ވިދާޅުވެއްޖެއެވެ. މޮސްކޯގައި ރަޝިޔާ ނޫސް އެޖެންސީއާ ވާހަކަ ދައްކަވަމުން ގޮރްބަޗޯވް ވިދާޅުވީ، ސޯވިއެޓް ޔޫނިއަން ރޫޅިގެން ގޮސް ފިނި ހަނގުރާމަ ނިމުމުން އެމެރިކާއާއި ހުޅަނގުން ކިބުރުވެރިކަމާއެކު ނޭޓޯ ވަރުގަދަ ކުރީއެވެ.
ރަޝިޔާއިން އެދެމުން ދަނީ ނޭޓޯއިން ރަޝިޔާގެ ސަރަހައްދާ ކައިރި ގައުމުތައް އެ ޖަމާއަތުގައި ނުހިމެނުމަށާއި އެގައުމުތަކަށް އެޖަމާއަތް ފުޅާ ނުކުރުމަށެވެ.
ގޮރްބަޗޯވް ވިދާޅުވީ، އެފަދަ ވިސްނުމެއް ހުޅަނގާއި އެމެރިކާއިން ގެންގުޅޭއިރު އެފަރާތްތަކާއެކު ހަމަހަމަ ގުޅުމެއް ބާއްވާނީ ކިހިނަކުން ހެއްޔެވެ؟
ކުރީގެ ރޫސީވިލާތް އުވިގެން ދިޔައީ ގޮރްބަޗޯފް ރައީސަކަށް ހުންނަވަނިކޮށެވެ. އެއަށްފަހު ރޫސީވިލާތް އުވާލުމަށްފަހު އެ ދައުލަތުގައި ހިމެނުނު ޖުމްހޫރިއްޔާތައް މިނިވަންވެ މުސްތަގިއްލު ޖުމްހޫރިއްޔާތަކަށް ވެގެން ދިޔައެވެ.
