އިސްލާމްއާބާދުގެ ރައްޔިތުން އިންޑިއާގެ އުއްތުރަ ޕްރަދޭޝްގެ ސަރަހައްދީ އިންތިޚާބުގައި ވޯޓްލާން ފަށައިފިއެވެ. މި އިސްލާމްއާބާދަކީ ޕާކިސްތާނުގެ ވެރިރަށެއް ނޫނެވެ. ނަމަވެސް، މިއީ ވިލެޖެކެވެ. މިވިލެޖު އޮންނަނީ، އިންޑިއާގެ އުއްތުރަ ޕްރަދޭޝްގެ ބިޖްނޫރު ޑިސްޓްރިކްޓްގައެވެ.
ޑިސްޓްރިކްޓްގެ މައި ސިޓީއާ ގާތްގަނޑަކަށް 40 ކިލޯމީޓަރު ދުރުގައި އޮންނަ އިސްލާމްއާބާދު ވިލެޖުގައި ދިހަހާހެއްހައި މީހުން ދިރިއުޅެއެވެ. އޭގެ ތެރެއިން 4،700 އެއްހާ މީހުންނަށް ވޯޓުލުމުގެ ހައްގު ލިބިގެންވެއެވެ.
އިސްލާމްއާބާދުގެ ރައްޔިތުން ބުނަ ގޮތުން އަވަށުގެ ނަމާހެދި ދުވަހަކުވެސް އެމީހުންނަށް އެއްވެސް މައްސަލައެއް ކުރިމަތިވެފައެއް ނުވެއެވެ.
އަވަށުގެ ދުވަސްވީ މީހުން ބުނާ ގޮތުން ކުރިން ޕޯސްޓްމަނުން ސިޓީތައް ބަހަން އަންނައިރު ޖޯކު ޖަހައި ހެއްޖެވެ. ނަމަވެސް މިހާރު ޕޯސްޓުން ސިޓީ ނައަންނާތީ ޕޯސްޓުމަނުންވެސް އަވަށަށް އައިހެއް ނޫޅެއެވެ.
މި ވިލެޖަށް އިސްލާމްއާބާދުގެ ނަން ދެވުނީ ކީއްވެގެން ކަމެއް އެކަކަށްވެސް ނޭނގެއެވެ. ނަމަވެސް މިއީ ޕާކިސްތާންގެ އިސްލާމްއާބާދަށްވުރެން ދޮށީ އިސްލާމްއާބާދެކެވެ. މި ވިލެޖުގެ ވެރިޔާ، ނުވަތަ ސަރްޖަންޗަކީ، އަންހެނެކެވެ. ސަރްވޭޝް ދޭވީ ބުނާގޮތުން އޭނާގެ މުނިކާފަގެ ޒަމާނުގައިވެސް މި އަވަށަށް ކިޔަނީ އިސްލާމްއާބާދެވެ.
މި ވިލެޖުގެ ނަމާ ހެދި އެއްވެސް ޒަމާނެއްގައި ހަމަނުޖެހުމެއް ހިނގާފައި ނުވާކަމަށްވެސް ސަރްޕަންޗު ބުނެއެވެ. އަދި ރައްޔިތުން ނަން ބަދަލުކުރާކަށެއްވެސް ނޫޅެއެވެ. މީގެ ހައެއްކަ މަސްކުރިން ހިސާބު ގަނޑުގެ ޕޮލިޓީޝަނަކު ނަން ބަދަލު ކުރަން އުޅުމުން މީހުން ވަނީ އޭނާއާ ދެކޮޅުހަދާފައެވެ.
އިސްލާމްއާބާދުގެ އާބާދީގައި އެންމެ ގިނައީ ހިންދޫ މަތީ ފަންތީގެ ޗައުހާންސް ދަރިކޮޅުގެ މީހުންނާއި ޕްރަޖާޕަތީސް ފަންތީގެ މީހުންނެވެ. މުސްލިމުންގެ އާބާދީގައި ހިމެނެނީ ގާތްގަނޑަކަށް 400 މީހުންނެވެ.
މި އަވަށުގެ މީހުންނަކީ، އުއްދަނޑިއާއި ބަދަނުގެ ދަނޑުވެރިކަން ކުރާ ބައެކެވެ.
