ޗައިނާ ސިފައިންގެ ގަލްވާން ކޮމާންޑަރު އޮލިމްޕިކް ޓޯޗު ބެއަރއެއްގެ ގޮތުގައި ޗައިނާއިން ހަމަޖައްސަން ނިންމުމުން ނިއުދިއްލީ ރުޅިގަދަވެއްޖެއެވެ. ނިއުދިއްލީން ބުނެފައި ވަނީ އޮލިމްޕިކްސް ހުޅުވުމުގެ ރަސްމިއްޔާތާއި ނިންމުމުގެ ރަސްމިއްޔާތުތަކުގައި އެއްވެސް ޑިޕްލޮމޭޓަކު އިންޑިއާ ތަމްސީލު ނުކުރާނެކަމަށެވެ. އަދި ބެއިޖިންގ އޮލިމްޕިކްސް ލައިވްކޮށް ދެއްކުމަށް ނިންމުމަށްފަހު ދޫރުދަރްޝަންއިން ވަނީ އެކަން ކެންސަލްކޮށްފައެވެ.
2020 ވަނަ އަހަރުގެ ޖޫން މަހު ގަލްވާންގައި ހިނގި ކުރިމަތިލުންތަކުގައި ބައިވެރިވި ޕީޕަލްސް ލިބަރޭޝަން އާމީ ސިފައިންގެ މީހަކު ނެރުމަށް ޗައިނާއިން ނިންމި ނިންމުމަކީ ހިތާމަހުރި ނިންމުމެއް ކަމަށް އިންޑިއާއިން ސިފަ ކުރިއެވެ. އިންޑިއާއިން ވަނީ ހުކުރު ދުވަހު ގޭމްސް ހުޅުވުމުގެ ރަސްމިއްޔާތުގެ ކުރިން ޑިޕްލޮމެޓިކް ބޮއިކޮޓް ކުރިކަން އިޢްލާން ކޮށްފައެވެ. ކުރިން އިންޑިއާއަކީ އޮލިމްޕިކްސް ބޮއިކޮޓް ނުކުރާން ނިންމި ގައުމެކެވެ.
އިންޑިއާގެ އެއް އެތުލީޓް ކަމަށްވާ ސްކިއަރ އާރިފް ޚާން ބައިވެރިވާ މި ރަސްމިއްޔާތު ލައިވްކޮށް ޓެލެކާސްޓް ނުކުރާނެކަމަށް ދޫރްދަރްޝަނުން ވަނީ ހާމަކޮށްފައެވެ.
ގަލްވާން ގައި ހިނގި ކުރިމަތިލުންތަކުގައި ޒަޚަމްވެ އަސްކަރީ ޝަރަފު ލިބިފައިވާ ޗައިނާ ސިފައިންގެ ފައުޖުގެ ކޮމާންޑަރެއް ކަމަށްވާ ކީ ފަބާއޯ )ފޮޓޯގައި ވާތް ފަރާތުން ދެވަނަ( އަކީ އޮލިމްޕިކް ޓޯޗު ހިފައިގެން ދުވާ 1200 އެއްހާ ދުވުންތެރިންގެ އެކަކެވެ.
